Gústaf spyr hvort það sé náttúrulegt og eðlilegt að vera hinsegin

Gústaf Adolf Níelsson segir að tekist hafi að hræða líftóruna úr oddvita Framsóknarflokksins í Reykjavík en í dag var skipan hans í varamannssæti í mannréttindaráði Reykjavíkur fyrir hönd Framsóknarflokksins og flugvallarvina dregið til baka. Hann var því einungis varamaður í um hálfan sólarhring.

Skipun Gústafs Adolfs í varamannssæti í mannréttindaráði Reykjavíkurborgar í gærkvöldi kallaði á gríðarlega hörð viðbrögð. Meðal annars frá Eygló Harðardóttur félagsmálaráðherra og Gunnari Braga Sveinssyni utanríkisráðherra sem skoraði á flokksystkini sín í Reykjavík að draga þessa ákvörðun til baka sem síðan var gert rétt fyrir hádegi í dag.

„Það hefur trúlega tekist að hræða líftóruna úr oddvita Framsóknarflokksins í Reykjavík og hann ekki séð sér annað fært en að draga þetta til baka,“ segir Gústaf Adolf.

Sjá einnig:Gústaf Níelsson býr við Kristnibraut

Eitt er víst að viðbrögð margra forystumanna Framsóknarflokksins sem og annarra í flokknum voru hörð og Sigmundur Davíð Gunnlaugsson forsætisráðherra skrifaði þetta á Facebook síðu sína fyrr í dag: „Hitti fulltrúa Framsóknar og flugvallarvina í morgun til að ræða flugvallarmál. Ræddum einnig þau mistök sem voru gerð við nefndarskipan. Fundurinn var góður og árangursríkur.

Samkvæmt heimildum fréttastofu er þetta „understatement“ hjá Sigmundi Davíð því borgarfulltrúarnir Sveinbjörg Birna Sveinbjörnsdóttir og Guðfinna Jóhanna Guðmundsdóttir hafi ekki velkst í vafa eftir fundinn með forsætisráðherra hver dagskipun hans var. Stuttu eftir fundinn kom yfirlýsing um að skipan Gústafs Adolfs hafi verið mistök og hún því dregin til baka.

Sjá einnig:Gústaf komið víða við

Gústaf Adolf, sem er flokksbundinn sjálfstæðismaður, hefur látið afgerandi skoðanir í ljós um réttindi samkynhneigðra, múslima og menningu þeirra. Hann telur sig engu að síður eiga erindi í mannréttindaráð borgarinnar.

„Já fullkomlega. Enda hef ég ekki talað gegn samkynhneigðum eða talað gegn múslimum. Ég er bara á annarri skoðun heldur en hinir meðvirku stjórnmálamenn nútímans sem tipla á tánum í kring um múslimana og þora ekki að taka neina umræðu. Þora ekki að móta raunhæfa innflytjendastefnu og svo framvegis. Í raun og veru hafa stjórnmálamennirnir valið sér hlutskipti konunnar í ofbeldissambandinu sem tiplar á tánum í kring um karlinn af ótta við óvænt viðbrögð hans. Og þannig eru stjórnmálamennirnir í nútímanum. Því miður.“

Gústaf Adolfa hefur m.a. sagt að samkynhneigðir væru afbrigðilegir og ónáttúrulegir.

„Ég held að það sé nú ofmælt. En er það kannski náttúrulegt og eðlilegt að vera hinsegin? Er það það?

Sjá einnig:Gústaf ekki vonsvikinn

Spurðu mig, mér finnst það. Ég er það.Hann hlær við þessu svari fréttamannsins en segir svo: „Nei, nei. Þetta er algert aukaatriði í þessari umræðu. Það sem mér finnst standa upp úr er að það er hægt að hræða fólk í stjórnmálum.“

En nú hafa margir kallað ykkar málflutning, þinn og fleiri sem talið með þeim hætti sem þið gerið um múslima að það sé einmitt hræðsluáróður gagnvart þeim? „Nei það er það nú ekki,“ segir Gústaf Adolf og vísar til framsöguræðu sem hann hélt á fundi í Iðnó sl. laugardag um málefni múslima og finna megi á netinu.