Erlent

Ók stórum flutninga­bíl viljandi á opin­bera byggingu

Kjartan Kjartansson skrifar
Flutningabíllinn var með farm á palli þegar honum var ekið inn í móttöku stofnunar sem gefur út ökuskírteini í Texas.
Flutningabíllinn var með farm á palli þegar honum var ekið inn í móttöku stofnunar sem gefur út ökuskírteini í Texas. AP/Lekan Oyekanmi

Einn er látinn og þrettán slasaðir eftir að ökumaður stórs flutningabíls ók honum viljandi inn í opinbera byggingu í Texas í Bandaríkjunum í dag. Manninum hafði verið synjað um endurnýjun á ökuréttindum.

Ökumaðurinn er sagður hafa stolið átján hjóla flutningabílnum og síðan ekið honum inn í inngang almannaöryggisskrifstofu Texas-ríkis við hraðbraut í Brenham, smábæ um 120 kílómetra vestur af Houston. Skrifstofan gefur út ökuskírteini.

Atwood Kenjura, bæjarstjóri Brenham, segir að ökumaðurinn, sem er 42 ára gamall karlmaður, hafi bakkað og ætlað sér að keyra aftur á bygginguna en verið stöðvaður áður en honum tókst það. Hann er nú í haldi lögreglu og er ómeiddur, að sögn CNN-fréttastöðvarinnar. Honum hafði verið synjað um endurnýjun ökuskírteinis síðdegis í gær.

Ríkisþingmaður repúblikana, Lois Kolkhorst, sagði í yfirlýsingu að ekkert af starfsfólki stofnunarinnar hafi slasast alvarlega. Einn hafi þó verið fastur í töluverðan tíma í byggingunni.

Bandaríkin Erlend sakamál
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið