Neytendur

Fyrir­tæki sem skili milljarða hagnaði leiki nú lausum hala

Kolbeinn Tumi Daðason skrifar
Ólafur Stephensen bendir á að nýju lögin hjálpi ekki aðeins bændum sem skrimpti heldur einnig fyrirtækjum sem nú þegar mali gull.
Ólafur Stephensen bendir á að nýju lögin hjálpi ekki aðeins bændum sem skrimpti heldur einnig fyrirtækjum sem nú þegar mali gull. Vísir/Vilhelm

Framkvæmdastjóri Félags atvinnurekenda vekur athygli á því að frumvarp matvælaráðherra sem samþykkt var á Alþingi í gær af þingmönnum ríkisstjórnarinnar auk Miðflokksins komi fjölmörgum stórfyrirtækjum ansi hreint vel. Nýju lögin komi ekki aðeins sláturhúsum á barmi gjaldþrots til bjargar. Hann er gagnrýninn á nýsamþykkt lög.

Hart var tekist á um frumvarpið á Alþingi í gær sem varðar undanþágu afurðastöðva í kjötiðnaði frá samkeppnislögum. Frumvarpið tók verulegum breytingum í meðförum atvinnuveganefndar og heyrðust hávær mótmæli frá Samkeppniseftirlitinu, Neytendasamtökunum, Alþýðusambandi Íslands, VR, Samtökum verslunar og þjónustu auk Félags atvinnurekenda.

Frumvarpið flaug í gegn með 26 atkvæðum stjórnarflokkanna og Miðflokksins gegn 19 atkvæðum Pírata, Flokks fólksins, Viðreisnar og Samfylkingarinnar. Nokkrir ráðherrar voru fjarverandi í atkvæðagreiðslunni. Þeirra á meðal Katrín Jakobsdóttir forsætisráðherra sem gegnir einnig embætti matvælaráðherra í veikindaleyfi Svandísar Svavarsdóttur.

Trausti Hjálmarsson, formaður Bændasamtakanna, tjáði Mbl.is í gær að lögin væru áfangasigur fyrir landbúnað og neytendur. Loksins væri verið að gera Íslendingum kleyft að reka landbúnað. Ólafur Stephensen, framkvæmdastjóri Félags atvinnurekenda, segir í Facebook-færslu ágætt að halda til haga hvaða fyrirtæki séu í hópi þeirra sem stjórnarmeirihlutinn hafi nú gefið grænt ljós á að þurfa ekki að pæla í samkeppnislögum. Nú hafi þau rými til samráðs og sameiningar án eftirlits.

„Þetta eru ekki bara lítil sláturhús á barmi gjaldþrots, eins og gefið var í skyn í umræðunum á þingi í gær,“ segir Ólafur og tínir til fyrirtæki.

  • Matfugl og Síld og fiskur/Ali. Langisjór, móðurfélag þessara fyrirtækja og fleiri, t.d. Ölmu leigufélags, hagnaðist um 3,9 milljarða 2022 og 13,7 milljarða árið áður.
  • Kaupfélag Skagfirðinga. Var rekið með 1,7 milljarða króna hagnaði árið 2022 og 5,4 milljarða hagnaði árið áður. Hagnaðurinn er svo mikill að kaupfélagið hefur þurft að ávaxta hann með fjárfestingum í rekstri skyndibitastaða í Reykjavík.
  • Sláturfélag Suðurlands. Hagnaður þess hefur farið vaxandi undanfarin ár; var 792 milljónir á síðasta ári skv. nýlegu uppgjöri, 549 milljónir árið 2022 og 233 milljónir árið áður. Í síðustu þremur ársreikningum SS er vitnað til betri markaðsaðstæðna og árangursríkra hagræðingaraðgerða, sem er aðeins á skjön við frásögn meirihluta atvinnuveganefndar af ástandinu í greininni.
  • Stjörnugrís. Það félag hagnaðist um 39 milljónir árið 2022 og 308 milljónir árið 2021.

„Eiginfjárstaða allra þessara smælingja, sem stjórnarmeirihlutinn hefur komið til hjálpar, er ágæt,“ segir Ólafur og má merkja hæðnistón í máli hans.

Landbúnaður Alþingi Samkeppnismál

Tengdar fréttir

Gapandi yfir gjörbreyttu frumvarpi og varar við því

Samkeppniseftirlitið gerir alvarlegar athugasemdir við frumvarp matvælaráðherra um breytingu á búvörulögum og varar við samþykki þess. Frumvarpið muni heimila kjötafurðastöðvum að hafa með sér hvers lags samráð, þær megi sameinast án takmarkana og hafi fullt sjálfdæmi um verðlagningu til bænda og neytenda. Hagsmunir neytenda verði fyrir borð bornir.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið