Viðskipti innlent

Ríf­lega helmingur vill ekki skipta við Rapyd

Árni Sæberg skrifar
Arik Shtilman, forstjóri og stofnandi Rapyd. Orðræða hans um átökin fyrir botni Miðjarðarhafs hefur komið Rapyd hér á landi í vandræði.
Arik Shtilman, forstjóri og stofnandi Rapyd. Orðræða hans um átökin fyrir botni Miðjarðarhafs hefur komið Rapyd hér á landi í vandræði. Rapyd

Tæplega sextíu prósent þeirra sem taka afstöðu vilja síður eða alls ekki eiga viðskipti við fyrirtæki sem nýta greiðslumiðlun frá Rapyd. 

Þetta er niðurstaða könnunar sem framkvæmd var af Maskínu fyrir Félagið Ísland-Palestína og Vísir hefur undir höndum.

Það hefur heldur betur gustað um greiðslumiðlunarfyrirtækið Rapyd undanfarna mánuði frá því að forstjóri þess, Arik Shtilman, lýsti yfir stuðningi við ísraelska herinn á LinkedIn síðu sinni í nóvember. 

Frá því Shtilman lýsti þessu yfir hefur stór hópur Íslendinga tekið sig til og sniðgengið Rapyd Europe sem starfar hér á landi en er í eigu hins ísraelska Rapyd.

Svo virðist sem herferð gegn Rapyd sé farin að hafa áhrif, ef marka má niðurstöðu könnunar Maskínu. 

Tæplega þúsund manns spurðir

Könnunin var lögð fyrir Þjóðgátt Maskínu, sem er þjóðhópur fólks (e. panel) sem dreginn er með tilviljun úr Þjóðskrá, á netinu. Svarendur eru alls staðar að af landinu 18 ára og eldri. 

Í könnuninni segir að svör hafi verið vegin samkvæmt mannfjöldatölum Hagstofunnar um kyn, aldur, búsetu og menntun, þannig að þau endurspegli þjóðina prýðilega. Við vigtun svara geti birst örlítið misræmi í fjöldatölum og hlutföllum sem orsakast af námundun.

Könnunin fór fram dagana 6. til 12. mars 2024 og voru svarendur 983 talsins.

Fimm prósent vilja helst skipta við Rapyd

Í könnunni var eftirfarandi spurning lögð fyrir: Hvað af eftirfarandi á best við um hug þinn til fyrirtækja sem nýta greiðslumiðlun frá Rapyd? Svarmöguleikar ásamt svarhlutfalli þeirra sem svöruðu voru eftirfarandi:

  • Ég vil alls ekki eiga viðskipti við þau 23,9 prósent
  • Ég vil síður eiga viðskipti við þau 33,2 prósent
  • Ég vil frekar eiga viðskipti við þau 1,2 prósent
  • Ég vil helst eiga viðskipti við þau 4,8 prósent
  • Það skiptir mig engu máli 36,9 prósent

21,4 prósent svöruðu með „veit ekki“ og 2,4 prósent vildu ekki svara. Þannig eru það 43 prósent aðspurðra sem gefa upp andstöðu við Rapyd.

Andstaðan eykst í takt við menntun

Andstaðan við Rapyd eykst eftir með menntun ef miða má við könnunina.

Samkvæmt henni vilja rúmlega fjörutíu prósent þeirra sem eru með grunnskólapróf forðast Rapyd og rúmlega fimmtíu prósent þeirra sem eru með framhaldsskólapróf. Nærri sjötíu prósent þeirra sem eru með háskólapróf vilja síður eða ekki skipta við fyrirtæki sem nota Rapyd.

Þá er skipting eftir flokkalínum nokkuð mikil. 93 prósent þeirra sem myndu kjósa Pírata ef kosið væri í dag vilja síður eða alls ekki skipta við Rapyd en að 21 prósent þeirra sem myndu kjósa Sjálfstæðisflokkinn.

Ítarlegar niðurstöður könnunarinnar má sjá í tengdum skjölum hér að neðan.

Tengd skjöl

Greiðslumiðlun Átök í Ísrael og Palestínu Skoðanakannanir

Tengdar fréttir

Starfsmenn Rapyd þurfi að sitja undir ómálefnalegum áróðri

Forstjóri Rapyd á Íslandi segir fyrirtækið víst vera íslenskt þó móðurfélag þess sé ísraelskt. Starfsfólk fyrirtækisins sé jafn vanmáttugt um að stöðva átökin á Gasa og aðrir hér á landi. Krafa um sniðgöngu á fyrirtækinu í nafni mannréttinda sé því ómakleg.

Rauði krossinn á Íslandi notar ekki lengur

Rauði krossinn á Íslandi nýtir sér ekki lengur þjónustu ísraelsku greiðslumiðlunarinnar Rapyd. Framkvæmdastýra samtakanna segir ákvörðunina hafa verið tekna í nóvember.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið