Erlent

Sænskir nem­endur grunaðir um skipu­lagða út­breiðslu veirunnar

Atli Ísleifsson skrifar
Um 70 þúsund manns búa í Östersund við Storsjön í Jämtland.
Um 70 þúsund manns búa í Östersund við Storsjön í Jämtland. Getty

Lögregla í sænska bænum Östersund rannsakar nú hvort að nemendur í framhaldsskóla hafi vísvitandi reynt að breiða út kórónuveiruna í þeirri von að mynda mótefni og þannig geta dimmiterað næsta vor.

SVT greinir frá málinu en búið er að tilkynna fjölda nemenda í framhaldsskóla í bænum til lögreglu. Eru nemendurnir sagðir hafa reynt að hafa uppi á smituðum einstaklingum, reynt að smitast sjálfir og svo reynt smita fleiri.

Nemendurnir eru sagðir hafa reynt að smitast sjálfir til að geta fagnað stúdentsprófunum almennilega líkt og hefð er fyrir í Svíþjóð.

Haft er eftir Monicu Sandström, formanni nemendafélagsins í Jämtlands Gymnasium, að hún kannist ekki við þessa hegðun nemenda, en að vitað sé að fjölmargir séu þreyttir á fjarkennslu og samkomutakmörkunum. Viti hún til þess að margir hafi sagst vona að þeir myndi mótefni til að geta fagnað lokum framhaldsskólans í vor. Hún hafi þó túlkað allt slíkt tal sem grín.

Hún fordæmir þá hegðun sem einhverjir kunni nú að vera grunaðir um og segir hana sýna „ótrúlegt tillitsleysi“ í garð annarra.

SVT segir að enn sem komið sé sé enginn nemandi með stöðu grunaðs manns, en að málið sé og verði áfram til rannsóknar hjá lögreglu.

Faraldur kórónuveiru (COVID-19) Svíþjóð
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið