Erlent

Ríkisdagblað í Norður-Kóreu segir Trump leika tveimur skjöldum

Sylvía Hall skrifar
Mike Pompeo og Kim Jong-un.
Mike Pompeo og Kim Jong-un. Vísir/EPA

Ríkisdagblað í Norður-Kóreu hefur sakað Bandaríkin um að leika tveimur skjöldum og jafnvel gera sig seka um glæpsamlega hegðun eftir að Donald Trump Bandaríkjaforseti aflýsti skyndilega heimsókn Mike Pompeo, utanríkisráðherra, til landsins.

Samningaviðræður milli ríkjanna hafa gengið erfiðlega eftir leiðtogafund Bandaríkjaforseta og Kim Jong-un í júní. Pompeo hefur óskað eftir því að Norður-Kórea stigi skref í átt að afkjarnorkuvæðingu, en yfirvöld í Norður-Kóreu krefjast þess að Bandaríkjamenn gefi eftir í ýmsum málum.

Á föstudag kenndi Trump Kína um hve erfiðlega hefur gengið í samningaviðræðum við Norður-Kóreu og gaf til kynna að ekkert myndi hafast í þeim efnum fyrr en Bandaríkjamenn hefðu leyst úr tolladeilum sínum við Kínverja.

Dagblaðið segir ummæli Trump gefa til kynna að hann ætli sér að fara í stríð við Norður-Kóreu muni ríkið ekki afkjarnorkuvæðast.

Þá hafa yfirvöld í landinu farið fram á friðaryfirlýsingu áður en afkjarnorkuvæðing hefjist, en Trump segir það ekki koma til greina fyrr en ríkið sýni árangur í afkjarnorkuvæðingu.  


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.