Viðskipti innlent

Wow Air á fáar veðhæfar eignir og eigið fé hefur rýrnað hratt

Þorbjörn Þórðarson skrifar

Skúli Mogensen, stofnandi og forstjóri Wow Air, er um þessar mundir á fundaferð um Evrópu til að kynna Wow Air fyrir fjárfestum í tengslum við skuldabréfaútboð hjá Pareto Securities. Wow Air hyggst sækja sér allt að tólf milljarða króna með útgáfu nýrra skuldabréfa. 

Wow Air tapaði 45 milljónum dollara, jafnvirði 4,9 milljarða króna, á tímabilinu frá júlí 2017 til júní 2018 að því er fram kemur í fjárfestakynningu sem félagið lét vinna í tengslum við skuldabréfaútboð félagsins hjá norska verðbréfafyrirtækinu Pareto Securities. Fyrst var greint frá þessu í Fréttablaðinu og Morgunblaðinu í dag.

Í fjárfestakynningunni, sem vefmiðillinn Kjarninn birti í dag, kemur fram að Wow Air stefni á að gefa út ný skuldabréf í útboðinu til evrópskra fjárfesta fyrir 500-1000 milljónir sænskra króna, jafnvirði 6-12 milljarða íslenskra króna.

Nýjar og áður óbirtar upplýsingar um rekstur Wow Air koma fram í fjárfestakynningunni. Auk upplýsinga um 4,9 milljarða króna tap á síðustu 12 mánuðum kemur fram að eigið fé Wow Air hafi numið aðeins 14 milljónum dala í lok júní á þessu ári, jafnvirði rúmlega eins og hálfs milljarðs króna. Eigið fé félagsins var 5,9 milljarðar í lok árs 2016 og hefur því rýrnað um 4,4 milljarða króna síðan þá.

Skúli Mogensen stofnandi og forstjóri Wow Air. Vísir/Anton Brink

Allar vélar í flugflotanum leigðar

Eins og fréttastofa Stöðvar 2 og Vísis greindi frá á mánudag var hlutafé Wow Air aukið um rúmlega helming fyrr á þessu ári þegar Skúli Mogensen, forstjóri og stofnandi Wow Air, lét breyta tveggja milljarða króna kröfu Títan fjárfestingafélags á hendur Wow Air í hlutafé. Samhliða þessu færði hann 60 prósenta hlut í Cargo Express ehf. undir Wow Air. 

Í fjárfestakynningunni kemur fram að allur flugfloti félagsins, alls tuttugu Airbus þotur, er leigður. Félagið á því í raun fáar veðhæfar eignir. Ólíkt til dæmis Icelandair sem á stóran hluta eigin flugflota og getur því notað þoturnar sem veðandlag ef þörf þykir.

Sjóðstreymi sýnir innstreymi og útstreymi handbærs fjár. Handbært fé er býsna lítið hjá Wow Air miðað við fjárfestakynninguna en félagið átti aðeins 6 milljónir dollara í handbært fé í lok júní á þessu ári. Til samanburðar átti Icelandair Group 237,1 milljón dollara í handbært fé í lok júní samkvæmt 6 mánaða uppgjöri félagsins. Að þessu sögðu er ekki útilokað að Wow Air geti lent í alvarlegum sjóðstreymisvanda ef ekkert breytist í rekstri félagsins. 

Að einhverju leyti skýrist lítið handbært fé hjá Wow Air af þeirri staðreynd að færsluhirðar skilgreina áhættu gagnvart flugfélögunum tveimur með mismunandi hætti. Í tilviki Wow Air er 80-90% af upphæð vegna greiddra fargjalda haldið eftir þangað til flugferð hefur verið farin. Í tilviki Icelandair fær félagið alla upphæðina strax greidda inn á reikninga félagsins, eins og fréttastofa Stöðvar 2 og Vísis greindi frá í síðasta mánuði.

Í fjárfestakynningunni kemur fram að skuldabréfaútboðið sé hugsað sem brúarfjármögnun fram að fyrirhuguðu hlutafjárútboði og skráningu Wow Air á hlutabréfamarkað á næstu átján mánuðum.

Skúli Mogensen er um þessar mundir á fundaferð um Evrópu ásamt öðrum stjórnendum Wow Air til að kynna félagið fyrir fjárfestum í tengslum við skuldabréfaútboðið hjá Pareto Securities. Svanhvít Friðriksdóttir upplýsingafulltrúi Wow Air segir að félagið muni ekki tjá sig um fjármögnun þess að svo svo stöddu.


Tengdar fréttir

WOW air í milljarða skuldabréfaútboð

Pareto hefur umsjón með 6 til 12 milljarða skuldabréfafjármögnun sem á að klárast í ágúst. Fjárfestafundir hefjast í vikunni. Útgáfan hugsuð sem brúarfjármögnun fram að skráningu á hlutabréfamarkað innan 18 mánaða.

Hlutafjáraukning hjá Wow Air

Skúli Mogensen, stofnandi og forstjóri Wow Air, jók hlutafé Wow Air um rúmlega helming fyrr á þessu ári þegar hann setti eignarhlut sinn í fraktflutningafélaginu Cargo Express ehf. inn í Wow Air. Þá breytti hann tveggja milljarða króna kröfum sínum á hendur Wow Air í hlutafé.

Greinandi hlutabréfa segir ástæðu til að hafa áhyggjur af Wow Air

Eiginfjárstaða Icelandair er margfalt sterkari en Wow Air en að bera saman rekstur félaganna er samt eins og að bera saman epli og appelsínur. Þetta segir sérfræðingur hjá hagfræðideild Landsbankans. Hann segir ástæðu til að hafa áhyggjur af Wow Air en félagið hefur ekki enn birt ársreikning fyrir síðasta ár.

Færsluhirðar skilgreina áhættu gagnvart Icelandair og Wow Air með ólíkum hætti

Færsluhirðingarfyrirtæki skilgreina áhættu gagnvart íslensku flugfélögunum með mismunandi hætti. Í tilviki Icelandair skilar fjárhæð fargjalds sér yfirleitt strax inn á reikninga félagsins. Í tilviki Wow Air halda færsluhirðingarfyrirtækin eftir 80-90 prósent af upphæðinni þangað til viðkomandi flugferð hefur verið farin.

Fjögur ráðuneyti vinna viðbragðsáætlun vegna mikilvægra atvinnufyrirtækja

Fjögur ráðuneyti vinna nú að gerð viðbragðsáætlunar vegna hugsanlegra áfalla í rekstri mikilvægra atvinnufyrirtækja sem gætu kallað á viðbrögð af hálfu stjórnvalda. Þar undir heyra flugfélög en miklar sviptingar hafa orðið að undanförnu í rekstri íslensku flugfélaganna, Icelandair og Wow Air.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
MARL
0,13
5
93.108
VIS
0
3
9.252
ORIGO
0
1
5.125
SJOVA
0
6
57.051
TM
0
1
15.150

Mesta lækkun dagsins


Félag
Br.%
Fjöldi
Velta*
REGINN
-2,06
5
38.300
SIMINN
-1,84
5
90.353
N1
-1,65
6
126.050
REITIR
-1,52
3
54.714
SYN
-1,42
5
94.490
Velkomin á Vísi. Þessi vefur notar vafrakökur. Sjá nánar.