Fótbolti

Hver er þessi 19 ára franski vandræðagemsi sem Arsenal var að kaupa?

Tómas Þór Þórðarson skrifar
Matteo Guendouzi er mættur til Arsenal.
Matteo Guendouzi er mættur til Arsenal. vísir/getty

Unai Emery, nýr knattspyrnustjóri Arsenal, hélt áfram að versla inn á sumarmarkaðnum í gær þegar að Skytturnar gengu frá kaupum á franska miðjumanninum Mattei Guendouzi frá 2. deildar liðinu Lorient.

Arsenal borgaði átta milljónir punda fyrir þennan 19 ára gamla miðjumann sem sló rækilega í gegn í næst efstu deild franska boltans á síðustu leiktíð.

Hann er fimmti leikmaðurinn sem Emery kaupir í sumar en áður voru komnir þýski markvörðurinn Bernd Leno, gríski miðvörðurinn Sokratis, svissneski bakvörðurinn Stephan Lichtsteiner og úrúgvæski miðjumaðurinn Lucas Torreira.

En, hver er þessi táningur sem klæðist nú rauðu treyjunni í Lundúnum? Verður hann lánaður við fyrsta tækifæri eða mun hann slá í gegn sem byrjunarliðsmaður á fyrstu leiktíð?

Strákurinn ungi er byrjaður að æfa með Skyttunum. vísir/getty

Fæddur á fótboltastað

Guendouzi fæddust 14. apríl 1999 í úthverfum Parísarborgar eins og svo margir aðrir frábærir fótboltamenn. Sextán leikmenn úr úthverfum frönsku höfuðborgarinnar voru á HM 2018 í Rússlandi eins og má lesa um hér.

Hann gekk í raðir Paris Saint-Germain árið 2005 og var á mála hjá Parísarrisanum í níu ár áður en hann skipti til Lorient og gekk inn í unglingaliðin þar árið 2014.

Hjá Lorent spilaði hann 24 leiki fyrir B-lið Lorient áður en að hann var færður upp í aðalliðið 17 ára gamall en hann spilaði sinn fyrsta leik fyrir Lorient í frönsku 1. deildinni árið 2016, aðeins 17 ára gamall.

Guendouzi spilaði sjö leiki til viðbótar fyrir Lorient í efstu deild tímabilið 2016/2017 en liðið féll. Hann sló svo í gegn í 2. deildinni á síðustu leiktíð þar sem að hann spilaði 18 leiki fyrir liðið sem endaði í sjöunda sæti og rétt missti af sæti í efstu deild á ný.

Guendouzi var með smá kjaft og var settur í frystinn í þrjá mánuði. vísir/getty

Settur í frystinn

Guendouzi hefði spilað fleiri leiki ef hann hefði ekki lent upp á kant við þjálfarann sinn Mickael Landreu í miðjum leik á móti Valenciennes í nóvember á síðasta ári. Strákurinn ungi var tekinn af velli í hálfleik og settur í frystinn í þrjá mánuði.

Eftir að hann sneri aftur í byrjunarlið Lorient missti hann af fjórum síðustu leikjum liðsins en sagt er, að það var vegna þess að hann neitaði að skrifa undir nýjan samning. Samningur hans við Lorient átti að renna út eftir næsta tímabil og því gat Arsenal fengið hann á tombóluverði.

Guendouzi á leiki fyrir U18, U19 og U20 ára lið franska landsliðið en honum hefur verið líkt við samlanda sinn Adrien Rabiot sem hefur gert það gott með PSG undanfarin misseri.

Það á eftir að koma í ljós hvort miðjumaðurinn ungi fari beint í aðalliðshópinn hjá Arsenal eða hvort hann verði lánaður til að spila reglulega en miðað við að Arsenal vann baráttu nokkurra liða um undirskrift Frakkans er talið líklegt að hann komi nú eitthvað við sögu hjá Emery í vetur.

Unai Emery þekkir vel til í Frakklandi eftir að þjálfa PSG. vísir/epa

Ungt og öflugt miðjupar?

Guendouzi getur spilað bæði sem varnarsinnaður miðjumaður og inn á miðri miðjunni en það hefur verið vandræðastaða hjá Arsenal um langa hríð.

Unai Emery er að reyna að þétta raðirnar inn á miðjunni en hann keypti einnig kraftmikla Úrúgvæjann Lucas Torreira frá Sampdoria. Mögulega eiga Guendouzi og hann eftir að mynda ungt og öflugt miðjupar fyrir aftan sóknartengiliðinn.

Þeir verða í baráttunni við Ainsley Maitland-Niles og Mohamed Elneny en mögulega verður Frakkinn ungi neðstur í goggunarröðinni þar sem að hann á nú ekki marga leiki að baki í efstu deild.

Það er allavega ljóst að Emery er búinn að fjárfesta í spennandi ungum leikmanni sem komst til metorða hjá liði sem er þekkt fyrir að skila af sér góðum leikmönnum. Því má ekki gleyma að Lorient skilaði af sér Laurent Koscielny og nú er mögulega komin önnur goðsögn frá Frakklandi frá sama stað.

Greinin er að stærstu leytin unnin upp úr úttekt Sky Sports.



Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira