Viðskipti erlent

Fara fram á kyrrsetningu á eignum Valitor

Birgir Olgeirsson skrifar
Greiðslukortafyrirtækið Valitor.
Greiðslukortafyrirtækið Valitor. Vísir/Stefán

Sveinn Andri Sveinsson, lögmaður Datacell og Sunshine Press Productions í skaðabótamáli þeirra gegn greiðslukortafyrirtækinu Valitor, ætlar að fara fram á að sýslumaðurinn á höfuðborgarsvæðinu kyrrsetji eignir Valitor upp á sex og hálfan milljarð.

Datacell og Sunshine Press production sáu um rekstur greiðslugáttar fyrir Wikileaks en Valitor ákvað einhliða og án fyrirvara að loka þessari gátt árið 2011. Hæstiréttur komst hins vegar að þeirri niðurstöðu árið 2013 að þessi ákvörðun hafi verið ólögmæt og í kjölfarið ákváðu fyrirtækin að höfða skaðabótamál.

Uggandi um þeirra hag
Kristinn Hrafnsson, sem er einn af eigendum Sunshine Press Productions, segir í samtali við Vísi að kyrrsetningarbeiðnin sé tilraun þeirra til að tryggja hagsmuni fyrirtækjanna. Hann segir forsvarsmenn fyrirtækjanna uggandi um þeirra hag eftir að hafa fylgst með átökum um eignarhald Valitor og möguleg uppskipti á milli Arion-banka og greiðslukortafyrirtækisins.

Kristinn Hrafnsson. Vísir

Markaður Fréttablaðsins greindi frá því miðvikudaginn 14. febrúar síðastliðinn að meirihluti hluthafa í Arion-banka sækist nú eftir því að hlutabréf Valitor verði greidd út í arð fyrir útboð. Sagði Markaðurinn jafnframt frá því að það myndi virkja kauprétt vogunarsjóða að 21,4 prósenta hlut í Valitor til viðbótar.

Eftir að Hæstiréttur komst að þeirri niðurstöðu að ákvörðun Valitor að loka fyrir greiðslugátt Wikileaks hefði verið ólögmæt höfðuðu Datacell og Sunshine Press Productions skaðabótamál gegn Valitor. Datacell og Sunshine Press Productions höfðu fengið til sín matsmenn sem mátu tjón fyrirtækjanna upp á 14 milljarða króna, með tilliti til dráttarvaxta.

Mun væntanlega klárast á næstu mánuðum
Kristinn segir dómkvadda matsmenn hafa síðan metið tjónið að núvirði upp á sex til sjö milljarða króna. Hljóðar því skaðabótakrafa fyrirtækjanna upp á 14 milljarða króna, en til vara er farið fram á þá upphæð sem dómkvöddu matsmennirnir höfðu komist að.

Hann segir Valitor hafa farið fram á yfirmat, sem fyrirtækið greiddi fyrir. Þrír menn voru skipaðir af dómi til að framkvæma yfirmatið sem síðan hefur ekki verið lagt fram. Kristinn segist reikna með að yfirmatið hafi verið á svipuðu róli og undirmatið sem nú er eina matið sem er gilt fyrir dómi.

Kristinn segir Valitor hafa í tvígang farið fram á frávísun á skaðabótakröfunni og hafa nú beðið um nýja matsmenn. Hann segir þó málið vera á lokametrunum og muni væntanlega klárast á næstu mánuðum.

Með kyrrsetningunni er ætlunin að tryggja hagsmuni fyrirtækjanna gagnvart Valitor þar til dómur er genginn.

Beiðni bandarískra stjórnvalda
Forsögu málsins má rekja til október 2010 þegar gengið var frá samningi um að fyrirtækið DataCell myndi sjá um rekstur greiðslugáttar fyrir Sunshine Press Production, rekstraraðila uppljóstrunarsíðunnar Wikileaks, til að taka á móti styrktargreiðslum frá velunnurum Wikileaks. Í lok árs 2010 fóru bandarísk stjórnvöld fram á að Visa og Mastercard skyldu loka á greiðslur til Wikileaks í gegnum Datacell. Valitor, sem er umboðsaðila Visa á Íslandi, lokaði greiðslugáttinni 8. júlí 2011 án fyrirvara eftir að styrktargreiðslur fyrir Wikileaks tóku að flæða inn í gáttina.


Tengdar fréttir

Með kauprétt að 21 prósents hlut í Valitor

Meirihluti hluthafa í Arion banka sækist nú eftir því að hlutabréf Valitor verði greidd út í arð fyrir útboð. Myndi virkja kauprétt vogunarsjóða að 21,4 prósenta hlut í Valitor til viðbótar.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
HEIMA
3,6
4
34.130
ORIGO
3,41
11
64.165
HAGA
3,34
9
116.729
FESTI
3,23
14
192.368
SIMINN
3,2
19
269.039

Mesta lækkun dagsins


Félag
Br.%
Fjöldi
Velta*
ICEAIR
-3,39
97
445.720
GRND
0
2
1.506
MARL
0
23
231.586
EIM
0
11
201.996
Velkomin á Vísi. Þessi vefur notar vafrakökur. Sjá nánar.