Fimm mismunandi lyf fundust í blóði Tigers

Fimm mismunandi lyf fundust í blóði Tigers Woods þegar hann var handtekinn í lok maí, grunaður um ölvunarakstur.

Samkvæmt eiturefnaskýrslu fannst m.a. blanda af sterkum verkjalyfjum, svefnlyfjum og kvíðastillandi lyfjum í sýni Tigers.

Kylfingurinn sagðist í síðustu viku vera saklaus af ásökunum um að hafa ekið undir áhrifum. Eftir nýjustu vendingar í málinu er búist við því að hann fái 12 mánaða skilorðsbundinn dóm.

Hinn 41 árs gamli Woods var handtekinn nálægt heimili sínu í Flórída 29. maí eftir að lögreglan fann hann sofandi í bíl sínum úti í vegkanti. Kylfingurinn þvertók fyrir að hafa verið að drekka og sagði að þetta væru óvænt viðbrögð við lyfseðilsskyldum lyfjum.

Woods leitaði sér hjálpar eftir handtökuna og fór í meðferð. Hann hefur ekkert spilað síðan í febrúar og er núna að jafna sig eftir fjórðu aðgerðina á baki.