Innlent

Ljósbogaofn í kísilverinu aldrei virkað sem skyldi

Þorbjörn Þórðarson skrifar

Ljósbogaofn í kísilverinu í Helguvík hefur aldrei virkað sem skyldi á þeim fimm mánuðum sem verksmiðjan hefur verið starfandi. United Silicon á í viðræðum við framleiðenda ofnsins um galla á ofninum. Á landinu eru sérfræðingar frá norska ráðgjafarfyrirtækinu Multiconsult til að komast að því hvað veldur stöðugri ólykt frá verksmiðjunni.

Hér sést (sjá myndskeið) Magnús Garðarsson þáverandi framkvæmdastjóri United Silicon og stærsti hluthafi fyrirtækisins á milli Ragnheiðar Elínar Árnadóttur þáverandi iðnaðar- og viðskiptaráðherra og Sigmundar Davíðs Gunnlaugssonar þáverandi forsætisráðherra þegar fyrsta skóflustungan að kísilverinu var tekin 27. ágúst 2014.

Magnús er nú hættur afskiptum af rekstri fyrirtækisins og hefur yfirgefið stjórn þess. Á rúmum fimm mánuðum sem kísilmálmverksmiðjan hefur verið starfandi hefur Umhverfisstofnun borist hátt í 400 kvartanir frá íbúum Reykjanesbæjar sem búa í nágrenni við verksmiðjuna vegna útblásturs frá henni.

Íbúarnir hafa kvartað undan sviða í augum, sviða í hálsi, ertingu í lungum, hausverk, ógleði og kláða í andliti. Ekkert þeirra fimm efna sem sóttvarnalæknir telur að geti útskýrt einkenni íbúanna komu fram í gögnum sem lögð voru fram vegna umhverfismats á verksmiðjunni á sínum tíma.

Í verksmiðjunni er 32 MW ljósbogaofn, hannaður og byggður af suður-afríska fyrirtækinu Tenova Pyromet á Ítalíu. Annar framleiðslubúnaður verksmiðjunnar er einnig frá Tenova Pyromet, þar á meðal viðamikið reykhreinsivirki. Búnaðurinn hefur aldrei virkað sem skyldi þá fimm mánuði sem verksmiðjan hefur verið starfandi. Samkvæmt upplýsingum fréttastofunnar á United Silicon í viðræðum við Tenova Pyromet um viðgerðir á ofninum og öðrum búnaði í verksmiðjunni. Þá komu til landsins í gær tvær sérfræðingar frá norska ráðgjafarfyrirtækiu Multiconsult til að komast að því hvað veldur stöðugri ólykt frá kísilverinu.

Umhverfisstofnun hefur tilkynnt United Silicon um stöðvun á starfsemi verksmiðjunnar um óákveðinn tíma frá og með morgundeginum nema andmæli berist sem stofnunin metur gild. Þær upplýsingar fengust hjá United Silicon í dag að tekin yrði ákvörðun í fyrramálið um hvort lögð verði fram andmæli við ákvörðun stofnunarinnar.


Tengdar fréttir

ÍAV krefur kísilverið um tvo milljarða

Deila ÍAV og United Silicon verður útkljáð fyrir gerðardómi á næstu mánuðum. Krafa verktakafyrirtækisins vegna meintra vanefnda hljóðar upp á rúma tvo milljarða króna. Forstjóri ÍAV vonar að niðurstaða fáist í byrjun sumars.

Óttuðust um líf sitt vegna lélegs aðbúnaðar í kísilverinu

Starfsmenn kísilversins í Helguvík hafa ítrekað kvartað undan öryggismálum í verksmiðjunni og hafa sumir hverjir óttast um líf sitt í vinnunni. Þetta segir formaður verkalýðs og sjómannafélags Keflavíkur. Hann segir að illa hafi gengið að bregðast við kvörtunum og segist óttast að verksmiðjan hafi aldrei verið tilbúin áður en hún hóf starfsemi

Kísilóværa

Bréf Umhverfisstofnunar til United Silicon um stöðvun rekstrar vegna mengunar sem stafar frá kísilmálmverksmiðju fyrirtækisins í Helguvík er skuggaleg og á köflum óþægileg lesning.



Fleiri fréttir

Sjá meira