Körfubolti

Martin frábær í síðasta leik LIU sem mætir Sacred Heart í fyrstu umferð

Tómas Þór Þórðarson skrifar
Martin Hermannsson er búinn að spila frábærlega fyrir LIU á tímabilinu.
Martin Hermannsson er búinn að spila frábærlega fyrir LIU á tímabilinu. mynd/liu

Martin Hermannsson, landsliðsmaður í körfubolta, átti enn einn stórleikinn þegar lið hans LIU Brooklyn tapaði á heimavelli, 88-83, gegn Bryant Bulldogs í lokaleik sínum í norðaustur deild bandaríska háskólakörfuboltans.

Martin var grátlega nálægt þrennu, en hann skoraði 20 stig, tók níu fráköst og gaf átta stoðsendingar í leiknum. Hann stal að auki tveimur boltum og hitti úr sjö af átta vítaskotum sínum í leiknum.

Hann hitti úr tveimur mikilvægum vítaskotum undir lok leiksins og minnkaði muninn í 85-83 en liðsfélagi hans klúðraði skoti í næstu sókn LIU sem varð til þess að Bryant kláraði leikinn.

Martin lauk deildarkeppninni (18 leikjum) með 16,5 stig, 4,5 fráköst, 4,7 stoðsendingar og 1,8 stolinn bolta að meðaltali í leik. Hann bætti öll meðaltölin frá því á nýliðaárinu sínu í fyrra.

LIU Brooklyn vann níu leiki af 18 í NEC-deildinni og hafnaði í sjötta sæti. Það mætir Sacred Heart-skólanum í fyrstu umferð úrslitakeppninnar á fimmtudaginn, en aðeins þarf að vinna einn leik til að komast í næstu umferð. Liðin mættust tvisvar á tímabilinu og unnu sitthvorn leikinn.

Sigurvegarinn í NEC-deildinni fer í lokamótið (March Madness) þangað sem 64 bestu lið Bandaríkjanna komast. LIU er eins og hin liðin í sinni deild þremur sigrum frá lokamótinu.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira