Gunnhildur og Sandra gerðu betur en flestar hafa gert í fyrsta EM-leik sínum
Gunnhildur Gunnarsdóttir og Sandra Lind Þrastardóttir spiluðu vel í fyrsta leik íslenska kvennalandsliðsins í körfubolta í undankeppni EM 2017 en þær voru báðar að spila sinn fyrsta leik í Evrópukeppni.
Það hafa ekki margar íslenskar landsliðskonur hafa gert betur í frumraun sinni í Evrópukeppni en þær Gunnhildur Gunnarsdóttir og Sandra Lind Þrastardóttir. KKÍ tók þetta saman á síðu sinni.
Gunnhildur Gunnarsdóttir var næststigahæsti leikmaður íslenska liðsins í leiknum úti í Ungverjalandi en hún skoraði 12 stig í leiknum, sex stig í hvorum hálfleik. Hún komst í hóp með þeim sem hafa skorað flest stig í frumraun sinni í Evrópukeppni.
Það eru í raun bara tveir leikmenn sem hafa skorað meira en Gunnhildur í sínum fyrsta leik í Evrópukeppni.Það er þær Helena Sverrisdóttir og Birna Valgarðsdóttir. Birna er einnig sú eina sem hefur skorað fleiri þrista en Gunnhildur í frumraun sinni í Evrópukeppni.
Helena Sverrisdóttir skoraði 25 stig í fyrsta EM-leiknum sínum sem var á móti Hollandi í Rotterdam 9. september 2006 en Birna Valgarðsdóttir skoraði 16 stig í þessum sama leik sem var fyrsti Evrópuleikur íslenska kvennalandsliðsins.
Birna skoraði þrjár þriggja stiga körfur í þessum fyrsta leik sínum en Gunnhildur skoraði tvo þrista á móti Ungverjum á laugardaginn. Tvær aðrar hafa skorað tvær þriggja stiga körfur í fyrsta EM-leiknum en það eru þær Kristrún Sigurjónsdóttir og Svava Ósk Stefánsdóttir.
Sandra Lind Þrastardóttir lék einnig sinn fyrsta leik í Evrópukeppni í Miskolc og tók í honum níu fráköst þar af sex þeirra í sókn. Tveir leikmenn hafa náð að taka fleiri fráköst í sínum fyrsta EM-leik en það eru þær Signý Hermannsdóttir (13) og Helena Sverrisdóttir (10).
Flest stig í sínum fyrsta EM-leik:
Helena Sverrisdóttir (Holland, 2006) 25 stig
Birna Valgarðsdóttir (Holland, 2006) 16 stig
Gunnhildur Gunnarsdóttir (Ungverjaland, 2015) 12 stig
Signý Hermannsdóttir (Holland, 2006) 8 stig
Kristrún Sigurjónsdóttir (Holland, 2006) 8 stig
Svava Ósk Stefánsdóttir (Holland, 2007) 6 stig
María Ben Erlingsdóttir (Holland, 2006) 2 stig
Hildur Sigurðardóttir (Holland, 2006) 2 stig
Guðrún Ósk Ámundadóttir (Slóvenía, 2008) 2 stig
Sandra Lind Þrastardóttir (Ungverjaland, 2015) 1 stig
Flest fráköst í sínum fyrsta EM-leik:
Signý Hermannsdóttir (Holland, 2006) 13 fráköst
Helena Sverrisdóttir (Holland, 2006) 10 fráköst
Sandra Lind Þrastardóttir (Ungverjaland, 2015) 9 fráköst
Kristrún Sigurjónsdóttir (Holland, 2006) 5 fráköst
Pálína Gunnlaugsdóttir (Holland, 2006) 5 fráköst
Gunnhildur Gunnarsdóttir (Ungverjaland, 2015) 4 fráköst
María Ben Erlingsdóttir Holland 2006 4 fráköst
Unnur Tara Jónsdóttir(Holland, 2007) 4 fráköst
Tengdar fréttir
Helena: Tölurnar gefa ekki rétta mynd af leiknum
„Þetta var og stórt tap og gefur kannski ekki alveg rétta mynd af leiknum.“
Ísland tapaði fyrir Ungverjum: „Í fyrsta skipti í langan tíma sem maður var stressaður“
„Mér fannst við bara sýna alla þá baráttu sem við höfum yfir að ráða,“ segir Gunnhildur Gunnarsdóttir, leikmaður íslenska landsliðsins í körfubolta, eftir tap gegn Ungverjalandi, 72-50, í fyrsta leik liðsins í undankeppni EM.
Helenu vantar bara eitt stig í viðbót
Ísland spilar í kvöld sinn fyrsta leik í undankeppni EM 2017 og nánast öruggt er að Helena Sverrisdóttir muni þá skora sitt þúsundasta landsliðsstig. Það er við hæfi að hún geri það á sínum gamla heimavelli í Ungverjalandi.
Helena og Gunnhildur hafa spilað alla leikina frá upprisunni
Tvær landsliðskonur hafa spilað alla 19 landsleiki Íslands frá því að íslenska kvennalandsliðið var endurvakið árið 2012.
