Enski boltinn

Engin rómantík í Souness: Leicester hefði fallið með Ranieri

Tómas Þór Þórðarson skrifar
Ranieri er atvinnulaus.
Ranieri er atvinnulaus. vísir/getty
Það varð allt brjálað í enska boltanum síðustu viku þegar ítalski knattspyrnustjórinn Claudio Ranieri var rekinn frá Leicester tæpu ári eftir að vinna óvæntasta og rómantískasta Englandsmeistaratitil í sögu deildarinnar.

Leicester er búið að vera í algjöru bulli á þessari leiktíð fyrir utan að komast í fyrstu tilraun í útsláttarkeppni Meistaradeildarinnar en liðið gælir við fallið og hefur ekki skorað deildarmark á nýju ári.

Koss dauðans stóð svo sannarlega undir nafni en nokkrum vikum áður en Ítalinn var látinn fara fékk hann stuðningsyfirlýsingu frá stjórninni.

Brottreksturinn vakti hörð viðbrögð og létu menn eins og José Mourinho og Gary Lineker í sér heyra en samkvæmt fréttum enskra miðla voru það eldri leikmenn Leicester sem voru ósáttir.

Graeme Souness, fyrrverandi leikmaður og knattspyrnustjóri Liverpool, er sparkspekingur á Sky Sports. Rómantíkin er ekki mikil hjá honum en Skotinn skilur vel að Ranieri var látinn fara tæpum 300 dögum eftir að vinna Englandsmeistaratitilinn.

„Þetta er harður veruleiki ensku úrvalsdeildarinnar. Leicester hefur verið að fara upp og niður á milli deilda undanfarna áratugi og er nú að gæla við fallið. Eigendurnir sáu að það gat alveg gerst og ég held að ef Ranieri hefði ekki farið hefði Leicester fallið. Liðið átti ekki séns,“ segir Souness.

„Ég skil þetta fullkomlega. Liðið var byrjað að rotna. Þið hafði séð leiki Leicester síðustu vikur og væntanlega spurt ykkur hvort hægt sé að snúa þessu við hjá þeim en hversu lengi átti að bíða eftir því?“

Souness kennir leikmönnunum um, en ekki Ranieri: „Leikmennirnir verða að taka þetta á sig. Enn einu sinni eru leikmenn að sleppa með skrekkinn,“ segir Graeme Souness.


Tengdar fréttir

Kónginum hent á dyr

Leicester City rak á fimmtudag stjóra félagsins, Claudio Ranieri. Ákvörðun eiganda Leicester kom mörgum á óvart og gerði fleiri hreinlega bálreiða.

Vardy segist ekki hafa kallað eftir brottrekstri Ranieri

Jamie Vardy segir ekkert til í þeim sögusögnum að hann hafi verið meðal leikmanna sem óskuðu eftir því að Claudio Ranieri yrði rekinn sem stjóri Leicester City en hann sendi fyrrum stjóra sínum kveðju á Instagram-síðu sinni í dag.

Koss dauðans stóð undir nafni

Claudio Ranieri er ekki lengur knattspyrnustjóri því hann var eins og flestir vita rekinn í gærkvöldi aðeins níu mánuðum eftir að hann gerði Leicester City að enskum meisturum.




Fleiri fréttir

Sjá meira


×