Vilja svör um hvort Síminn, Tal og 365 ætli að loka á Deildu.net

Þrjú samtök höfundaréttarhafa hafa gefið þremur fjarskiptafyrirtækjum, Símanum, Tali og 365, frest til miðvikudags til að svara því hvort lokað verði á aðgang viðskiptavina fyrirtækjanna að vefsíðunum Deildu.net og Pirate Bay. Héraðsdómur úrskurðaði í síðustu viku að setja ætti lögbann á aðgang viðskiptavina Vodafone og Hringdu að síðunum. Bæði fyrirtæki sögðust ekki ætla að loka fyrr en lögbannið sjálft lægi fyrir.

„Í upphafi var óskað eftir lögbanni á fimm fjarskiptafyrirtæki en vegna formgalli á máli gegn Símanum höfum við óskað eftir endurupptöku. Málið gegn Tali, þar var einn dómari vanhæfur og þurfti að segja sig frá málinu á síðustu stundu, en 365 ákváðu að hlíta lögbanninu frá upphafi,“ segir Guðrún Björk Bjarnadóttir, framkvæmdastjóri STEFS.

Guðrún segir að bréfin séu send til fyrirtækjanna þriggja í von um að ekki þurfi að höfða ný mál á hendur þeim til að fá niðurstöðu. Þegar liggi fyrir að sýslumaður eigi að leggja á lögbann vegna aðgangs að þessum vefsíðum. „Til þess að fara ekki í viðbótarkostnað við að reka viðbótar dómsmál þegar alveg ljóst er í þessum tveimur málum að búið sé að taka á öllum efnisatriðum. Þetta er til þess að stytta í rauninni leiðina,“ útskýrir hún.

Í kjölfar dóms Héraðsdóms Reykjavíkur í máli höfundarréttarhafa gegn Vodafone og Hringdu fóru samtökin fram á að lögbann yrði gefið út. Ekki hefur fengist dagsetning á fyrirtöku þeirrar kröfu.

Deildu.net og Pirate Bay eru torrent-síður sem gera fólki kleift að sækja fjölbreytt úrval af skrám í gegnum netið. Þar á meðal er höfundarréttarvarið myndefni og tónlist og er það ástæðan fyrir lögbannskröfunni.

Málið er hinsvegar ekki svo einfalt að með úrskurðinum sé búið að loka fyrir aðgengi að síðunum og þeirri þjónustu sem þær veita. Tiltölulega auðvelt er fyrir fólk að komast inn á slóðirnar með proxy-þjónustum, líkt og Vodafone benti á fyrir héraðsdómi. Deildu.net hefur líka skipt um vefslóð en dómurinn nær aðeins til þeirrar sem var í gildi þegar málið var tekið fyrir. 

365 er útgefandi Vísis.