Viðskipti innlent

Verður leiðrétt strax eftir helgi

Óli Kristján Ármannsson skrifar
Biðraðir við skattskil heyra sögunni til því núna skila nær allir á netinu.
Biðraðir við skattskil heyra sögunni til því núna skila nær allir á netinu. Fréttablaðið/Pjetur
Fyrir mistök við úrvinnslu skattframtala hjá ríkisskattstjóra var tryggingagjald ranglega sett á hóp einstaklinga.

Að sögn Skúla Eggerts Þórðarsonar ríkisskattstjóra nær þetta til nokkur hundruð einstaklinga, sem tölvukerfið taldi í rekstri án þess að þeir væru það í raun.

„Þeir gefa væntanlega upp laun sín í reit 21 en ekki 24 og tryggingagjald var sett á þá vegna mistaka við vélvinnsluna,“ segir Skúli Eggert.

„Og þetta verður leiðrétt núna í fyrstu vikunni í ágúst. Fjárhæðir á hvern eru ekki háar og við vorum búin að átta okkur á þessu.“

Skúli Eggert Þórðarson
Raunar segir Skúli Eggert álagninguna aldrei hafa gengið jafn vel og villur aldrei verið færri. 

Fjöldi þeirra sem kæra álagningu hafi hins vegar verið mjög svipaður frá ári til árs. 

„Þetta eru í kringum 12 til 13 þúsund manns.“ 

Í ár séu þetta þó eitthvað örlítið færri og því séu líkur á að kærurnar verði líka færri. Embættið hafi hins vegar náð verulegum árangri við að flýta afgreiðslu kæranna. 

„Í fyrra náðum við að klára allar kæruafgreiðslur á tveimur og hálfum mánuði, en þegar var lengst þá tók meira en eitt ár að afgreiða þær.“






Fleiri fréttir

Sjá meira


×