Vaughn slapp með skrekkinn

Leikarinn Vince Vaughn þurfti að blása í áfengismæli eftir að hann var stöðvaður á bíl sínum af lögreglunni í Scottsdale í Arizona. Leikkonan Jennifer Aniston var með honum í för. Vaughn var undir leyfilegum áfengismörkum og slapp því með skrekkinn. "Við stungum upp á því að hann héldi ekki áfram að aka bílnum," sagði talsmaður lögreglunnar. "Hann var búinn að drekka eitthvað en var ekki yfir áfengismörkunum," sagði hann. Eftir atvikið lagði Vaughn hvíta sendiferðabílnum sínum í næsta nágrenni og steig ásamt Aniston upp í bíl vinar þeirra sem hafði ekið á eftir þeim. Aniston og Vaughn leika saman í myndinni The Break Up, sem er væntanleg í kvikmyndahús. Aniston skildi við Brad Pitt í október eftir fjögurra og hálfs árs hjónaband. Síðan þá hefur hún oft sést með Vaughn. Telja margir að samband þeirra sé komið á alvarlegt stig.