Ungliðar komu, sáu og sigruðu á landsfundi

Forysta Sjálfstæðisflokksins fékk rússneska kosningu á landsfundi flokksins í dag eða yfir níutíu prósent atkvæða. Nýkjörinn ritari segir flokkinn hafa staðfest á fundinum að hann treysti ungu fólki til ábyrgðarstarfa.

Það er óhætt að segja að nýkjörin forysta Sjálfstæðisflokksins hafi fengið glæsilega kosningu á landsfundinum og að unga fólkið hafi komið, séð og sigrað.

Bjarni Benediktsson var endurkjörinn formaður flokksins með 96 prósentum atkvæða sem er besta kosning sem hann hefur fengið í formannsembættið í þau fimm skipti sem hann hefur verið í framboði. Ólöf Nordal sem nú tekur í annað sinn við varaformennskunni fékk enn glæsilegri kosningu eða 96,7 prósent atkvæða.

Óvæntasta uppákoman á landsfundinum var hins vegar óvænt framboð Áslaugar Örnu Sigurbjörnsdóttur í embætti ritara. Eftir að hún bauð sig fram í gær dróg Guðlaugur Þór Þórðarson framboð sitt til endurkjörs til baka nokkrum klukkustundum síðar.

„Það er best fyrir flokkinn minn, fyrir flokkinn okkar, þegar ungur öflugur frambjóðandi býður sig fram í embætti ritara að ég stigi til hliðar og styðji það framboð og ég vona að við gerum það öll,“ sagði Guðlaugur áður en kosningar um embætti hófust í flokknum í dag.

Það var engu að síður spenna í loftinu þegar úrslit um kosninganna lágu fyrir, þar sem Áslaug Arna hlaut 91,9 prósent atkvæða.

„Kæru vinir. Í gær spurði ég ykkur hvort Sjálfstæðisflokkurinn meinti það þegar hann segðist hlusta á og treysta ungu fólki. Nú stend ég hér og spurningunni hefur verið svarað,“ sagði Áslaug Arna þegar hún ávarpaði fundinn eftir að úrslit lágu fyrir.

Í viðtali við fréttastofu sagðist hún telja sig geta breikkað ásýnd forystu flokksins í augum kjósenda en hún er tæplega 25 ára gömul laganemi.

Hverjir vissu af þessu framboði, voru þetta samantekin ráð hjá ungliðum? Þetta virtist koma fólki svolítið á óvart.

„Þetta voru ekki samantekin ráð hjá ungliðum. Þetta var bara mín einstaklingsákvörðun sem ég tók í gær,“ segir Áslaug Arna.

Ólöf Nordal innanríkisráðherra kallaði eftir því í framboðsræðu sinni til varaformanns á landsfundinum að ungt fólk yrði kallað til starfa og fékk því ósk sína uppfyllta.

„Þetta kom öllum mjög mikið á óvart. En ég held að þetta muni efla Sjálfstæðisflokkinn. Við höfum verið að kalla eftir ungu fólki. Þessi fundur hefur ekki hvað síst snúist um unga fólkið. Þau hafa verið einstaklega kraftmikil og skemmtileg á þessum fundi,“ segir Ólöf Nordal.