Sverðið frá árabilinu 950-1000

Sérfræðingar Þjóðminjasafnsins álykta að sverðið sem fannst nálægt Ytri Ásum í Skaftárhreppi um síðustu helgi hafi verið smíðað í kringum kristnitökuna árið 1000. Þetta sýna niðurstöður röntgengreiningar á sverðinu sem gerð var í Þjóðminjasafninu í gær.

Sandra Sif Einarsdóttir forngripaforvörður hjá Þjóðminjasafninu segir að röntgengreiningin staðfesti að sverðið sé af svokallaðri Q gerð. Það þýði að sverðið hafi líklega verið smíðað einhvern tímann á síðari hluti tíundu aldar og jafnvel inn á þeirri elleftu. „Árið 950 eru þá neðri mörkin og árin eftir 1000 efri mörkin,“ segir Sandra.

Röntgengreiningin staðfestir einnig að blóðrefill er á sverðinu, en um er að ræða rák sem liggur í miðju sverðsins frá neðri hjöltum upp að oddi.

Sverðið er nú hjá forvörðum á starfsstöð Þjóðminjasafnsins í Kópavogi. „Núna tekur við forvarsla til að koma sverðinu í stöðugt ástand,“ segir Ármann Guðmundsson fornleifafræðingur hjá Þjóðminjasafninu sem rannasakað hefur sverðið ásamt sérfræðingum undanfarna daga.