Ráðning Klopp staðfest í dag

Jürgen Klopp er væntanlegur til Englands í dag að sögn vefsíðu Sky Sports sem fullyrðir að hann verði tilkynntur sem nýr knattspyrnustjóri Liverpool nú síðdegis.

Klopp verður eftirmaður Brendan Rodgers sem var sagt upp störfum á sunnudaginn, eftir 1-1 jafntefli Liverpool gegn Everton.

Klopp er 48 ára gamall og varð tvívegis þýskur meistari á sjö árum sem knattspyrnustjóri Dortmund. Viðræður hans við eigendur Liverpool eru sagðar langt komnar.

Félagið hafði fyrst samband við Klopp á mánudag, sem og Ítalann Carlo Ancelotti en hann gaf starfið frá sér. Eigendur Liverpool vildu ganga fljótt frá ráðningu nýs knattspyrnustjóra en liðið á næst leik gegn Tottenham þann 17. október.

Talið er að Klopp komi með sitt eigið starfslið með sér á Anfield, þar af aðstoðarþjálfarann Zeljko Buvac.