Grímur til varnar gegn mengun

Þúsundir manna tóku þátt í hinu alþjóðlega Peking-maraþoni sem fram fór um helgina. Mikill fjöldi keppenda kaus hins vegar að hlaupa með grímur til að verjast mikilli mengun í borginni.

Alþjóðlega heilbrigðismálastofnunin sagði mengunina vera langt yfir hámarksgildum í mengunarmælingum. Aðstandendur maraþonsins vöruðu keppendur við mikilli mengun en neituðu hins vegar að fresta maraþoninu þrátt fyrir tilmæli frá heilbrigðisyfirvöldum og íþróttasérfræðingum.

Maraþonið var haldið í 34. skiptið og má með sanni segja að grímur keppendanna hafi sett svip sinn á þennan fjölsótta viðburð.