Erlent

Ný ríkis­stjórn mynduð á Græn­landi

Atli Ísleifsson skrifar
Múte B. Egede er formaður Inuit Ataqatigiit og verður áfram formaður landsstjórnarinnar.
Múte B. Egede er formaður Inuit Ataqatigiit og verður áfram formaður landsstjórnarinnar. EPA

Flokkurinn Naleraq á ekki lengur aðild að ríkisstjórn Grænlands. Hans Enoksen, formaður flokksins, segir í samtali við KNR að Inuit Ataqatigiit (IA), flokkur Múte B. Egede, formanns landsstjórnarinnar, hafi ákveðið að binda enda á samstarfið og mynda þess í stað stjórn með flokknum Siumut.

Grænlenskir fjölmiðlar segja frá þessum tíðindum í dag, en Egede og Erik Jensen, formaður Siumut, kynntu samstarfið á fréttamannafundi í dag. Segja þeir ríkisstjórnarsamstarfið meðal annars snúast um að gera breytingar á lögum sem snúa að ferðamennsku, opna stjórnsýslu, áherslu á grænlenska tungu, frelsi borgaranna, jafnréttismál og að áfram verði unnið í átt að sjálfstæðis landsins.

„Það var ekki hægt að komast hjá því að taka eftir að við og Naleraq hefðum þróast í áttina hvor frá öðrum pólitískt. Ég þakka fyrir samstarfið,“ sagði Egede í dag.

IA og Siumut mynduðu einnig saman ríkisstjórn árið 2016, þá með Naleraq innanborðs.

Þingkosningar fóru fram á Grænlandi fyrir um ári síðan og vann IA þá mikinn sigur. IA og Naleraq mynduðu þá ríkisstjórn sem naut stuðnings sextán af 31 þingmanni. Flokkurinn Atassut ákvað þó að styðja ríkisstjórnina.

Þingmenn IA og Siumut telja samtals 22. Egede verður áfram formaður landsstjórnar Grænlands í nýrri ríkisstjórn.

Grænland
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið