Menning

Lotta fer á nagladekk

Benedikt Bóas skrifar
Leikhópurinn. Verkið verður nú sýnt innandyra.
Leikhópurinn. Verkið verður nú sýnt innandyra.

Við erum að fara að setja upp Rauðhettu, 10 árum síðar. Núna erum við komin undir þak, erum innandyra. Við höfum svolítið endurnýjað verkið og poppað þetta upp frá fyrri útgáfu með nýjum lögum og trúum að við getum gert betur,“ segir Anna Bergljót Thorarensen, meðlimur í Leikhópnum Lottu en hópurinn mun hefja vetrarsýningar um helgina.

Þetta er í annað sinn sem hópurinn setur verkið upp en það var fyrst frumsýnt fyrir áratug og þá sýnt utandyra um allt land. Nú verður rykið dustað af þessu skemmtilega verki og fært nýjum og gömlum áhorfendum í glænýjum búningi.

Ævintýrið um Rauðhettu og úlfinn þekkja allir en í meðförum Lottu hefur tveimur þekktum ævintýrum til viðbótar verið bætt í leikinn. Það eru sögurnar um grísina þrjá og systkinin Hans og Grétu. Þá eru í verkinu fleiri en tíu stórskemmtileg lög sem binda söguna saman. Úr verður gómsætur ævintýrakokteill. „Við erum að fikta aðeins í sögunni, setjum okkar svip á ævintýrin þó svo þau lúti ákveðnum reglum, svona að einhverju leyti,“ segir hún.

Hópurinn áætlar hátt í 30 sýningar í Tjarnarbíói í janúar, febrúar og mars en ætlar einnig að leggja land undir fót og heimsækja yfir 20 staði á landinu öllu og færa landsbyggðinni Ævintýraskóginn alveg upp að dyrum. „Rauðhetta fær að lifa út mars og svo byrjum við á sumarverkefninu. Byrjum hér í rúman mánuð, svo förum við á flakk um landið. Lottan fer á nagladekk. Við förum í þrjár stórar ferðir. Vesturland og Vestfirði, svo Norðurland og loks Suður- og Austurland. Frá Vík að Vopnafirði. Þetta eru um 20 bæjarfélög – aðeins færri en á sumrin – en samt heilmikið.

Þetta er það sem við gerum til að sinna landsbyggðinni. Við gátum ekki sett þetta upp án þess að heimsækja vini okkar á landsbyggðinni.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.