Innlent

Þremur sundlaugum lokað sökum kulda

Stefán Ó. Jónsson skrifar
Sundlaugin á Hellu er meðal þeirra lauga sem lokað hefur verið vegna kulda. Hér má sjá sundlaugina þegar aðeins hlýrra var í veðri.
Sundlaugin á Hellu er meðal þeirra lauga sem lokað hefur verið vegna kulda. Hér má sjá sundlaugina þegar aðeins hlýrra var í veðri. Aðsend

Vegna kuldatíðar er mikil notkun á heitu vatni frá Rangárveitum. Í tilkynningu frá Veitum segir að vegna þessa sé þrýstingur að minnka í kerfinu og valda heitavatnsleysi á nokkrum stöðum.

Af þeim sökum segjast Veitur þurfa að „skerða afhendingu vatns,“ eins og það er orðað. Það muni meðal annars endurspeglast í lokun þriggja sundlauga; á Hellu, Hvolsvelli og í Laugalandi.

Laugarnar lokuðu í gærmorgun og gert er ráð fyrir því að þær verði lokaðar alveg til miðnættis í kvöld - „sé miðað við veðurspá eins og hún er núna,“ eins og segir í tilkynningu veitna.

Umrædd veðurspá gerir ráð fyrir að það verði snjókoma eða él í í flestum landshlutum í dag. Frostið verður á bilinu 1 til 12 stig, en víða frostlaust við suðurströndina. Engu að síður geti orðið talsvert frost í innsveitum í nótt. Það muni þó hlýna aftur á næstu dögum.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.