Viðskipti innlent

Fjármálastjóri Kaupþings segist ekki hafa komið að lánveitingu til bankastjórans

Kjartan Kjartansson skrifar
Guðný Arna Sveinsdóttir fer yfir málin með verjanda sínum, Sigurði G. Guðjónssyni, í Héraðsdómi í morgun.
Guðný Arna Sveinsdóttir fer yfir málin með verjanda sínum, Sigurði G. Guðjónssyni, í Héraðsdómi í morgun. Vísir/Vilhelm

Fyrrverandi fjármálastjóri Kaupþings sem ákærður er fyrir hlutdeild í meintum umboðssvikum Hreiðars Más Sigurðssonar, fyrrverandi bankastjóra Kaupþings, segist ekki hafa komið að lánveitingu til hans eða tekið ákvarðanir um hana. Hreiðar Már er sakaður um að hafa stefnt fé bankans í hættu með því að hafa látið hann lána eignarhaldsfélagi í sinni eigu rúmt hálfs milljarðs króna kúlulán árið 2008.

Málið er það síðasta sem embætti sérstaks saksóknara sem þá hét ákærði fyrir í tengslum við bankahrunið. Aðalmeðferð í því hófst í Héraðsdómi Reykjavíkur í morgun. Þar lýsti Hreiðar Már ákærunni gegn sér sem ömurlegri en hann er einnig ákærður fyrir innherjasvik þegar hann seldi eignarhaldsfélagi sínu hlutabréf sem hann hafði eignast í bankanum með því að virkja kauprétt sinn.

Guðný Arna Sveinsdóttir, fyrrverandi fjármálastjóri Kaupþings, er ákærð fyrir hlutdeild í meintum umboðssvikum Hreiðars Más, fyrst og fremst með fyrirmælum og samskiptum við lægra setta starfsmenn bankans.

Málið varðar lán sem einkahlutafélag Hreiðars Más fékk frá bankanum og hlutabréf í bankanum sem hann keypti á grundvelli kaupréttar í ágúst 2008 og hann færði yfir í félagið í kjölfarið.

Saksóknari heldur því fram að Hreiðar Már hafi látið bankann veita félagi sínu lánið án samþykkis stjórnar bankans og nægilegra trygginga. Hann hafi fengið rúmar 300 milljónir króna til frjálsra afnota eftir að hafa selt eignarhaldsfélagi sínu hlutabréfin á markaðsvirði eftir að hana keypt þau persónulega á lægra kaupréttargengi.

Hreiðar Már segir hins vegar að lánið hafi verið í samræmi við ráðningarsamning hans og stefnu bankans um kauprétt. Bankinn hafi lánað starfsmönnum fyrir skattkröfum sem komu upp við nýtingu þeirra á kauprétti. Mismunurinn á verðinu sem hann lét eignarhaldsfélag sitt greiða fyrir bréfin og því sem hann greiddi persónulega hafi allur farið í skattgreiðslur vegna fyrri kaupréttarnýtingar hans.

Hreiðar Már og Guðný með verjendum sínum í morgun. Vísir/Vilhelm

Hafi aldrei tekið ákvarðanir

Guðný Arna sagði fyrir dómnum að sem fjármálastjóri Kaupþingssamstæðunnar hafi hún séð um bókhald og uppgjör bankans en hvorki um lánveitingar né áhættustýringu.

Eina aðkoma hennar að því þegar starfsmenn fengu lán frá bankanum vegna kaupréttar og skatta eins og Hreiðar Már gerði hafi verið að hafa milligöngu um að koma upplýsingum á framfæri við þá sem sáu um frágang. Hún hafi jafnframt sjálf verið í fríi þegar lánið til Hreiðars Más hafi verið til meðferðar innan bankans.

Finnur Þór Vilhjálmsson, saksóknari, bar ýmis gögn og tölvupósta undir Guðnýju, meðal annars nokkra þar sem hún spurðist fyrir um lánveitinguna til félags Hreiðars Más. Hún sagðist hins vegar ekki geta séð að henni hafi verið kunnugt um samskipti innan bankans um lánveitinguna.

Fullyrti Guðný Arna að hún hafi ekki komið að lánveitingum sem þessum og ekki tekið neinar ákvarðanir um þær. Stjórn bankans hafi haft heimild til að taka hvaða ákvörðun sem er. Hún hafi samþykkt að fjármagna kaupréttarsamninga starfsmanna og skattskuldir sem gætu komið til af völdum þeirra. Aðrir hafi hins vegar farið með þau mál innan bankans.

„Ég tók aldrei neinar ákvarðanir um neinar lánveitingar. Aldrei nokkurn tímann,“ sagði Guðný Arna sem neitaði því jafnframt að hafa nokkru sinni rætt lánið við Hreiðar Má.

Finnur Þór Vilhjálmsson saksóknari.

Viltu að ég giski?

Sakarefnin í málinu áttu sér stað fyrir tíu árum. Finnur Þór Vilhjálmsson, saksóknari, sagði vitnum að hann gerði sér grein fyrir að langt væri um liðið og að þau þyrftu aðeins að segja frá eins og þau myndu.

Mörg vitnanna sem voru kölluð fyrir dóminn í dag báru enda við að þau myndu ekki eftir póstum og öðrum samskiptum sem tengdust láninu til eignarhaldsfélags Hreiðars Más.

„Viltu að ég giski á hvað ég var að hugsa fyrir tíu árum?“ spurði Guðný Arna saksóknarann þegar hann vildi vita hvað hún hefði hugsað í tengslum við tiltekinn póst sem hún hafði sent.

Ingólfur Helgason, fyrrverandi forstjóri Kaupþings á Íslandi, sagðist einnig ítrekað ekki vilja geta í eyðurnar varðandi samskipti frá því í ágúst árið 2008 sem saksóknarinn bar undir hann.

„Ég treysti mér ekki til að útskýra það neitt nánar,“ sagði Ingólfur spurður um orðalagsins „illu er bestu af lokið“ sem hann notaði í tölvupósti til starfsmanns samskiptasviðs bankans þegar tilkynna átti um kaup Hreiðars Más á bréfum í bankanum.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
HEIMA
3,6
4
34.130
ORIGO
3,41
11
64.165
HAGA
3,34
9
116.729
FESTI
3,23
14
192.368
SIMINN
3,2
19
269.039

Mesta lækkun dagsins


Félag
Br.%
Fjöldi
Velta*
ICEAIR
-3,39
97
445.720
GRND
0
2
1.506
MARL
0
23
231.586
EIM
0
11
201.996
Velkomin á Vísi. Þessi vefur notar vafrakökur. Sjá nánar.