Viðskipti innlent

„Dettur ekki í hug“ að fara inn í H&M á Íslandi

Stefán Ó. Jónsson skrifar
Þorsteini Sæmundssyni misbýður verðmunurinn í H&M.
Þorsteini Sæmundssyni misbýður verðmunurinn í H&M. Vísir
Þorsteinn Sæmundsson, þingmaður Miðflokksins, spyr sig hvers vegna afnám tolla og vörugjalda á fatnað hafi ekki skilað sér betur til neytenda. Þrátt fyrir niðurfellinguna borgi það sig ennþá fyrir fólk að versla föt á netinu og flytja þau sjálf inn - og það ekki „á sömu frakt og kaupmenn eru að gera.“

Þorsteinn var gestur þáttarins N-sins þar sem hann ræddi um neytendamál við Guðmund Hörð Guðmundsson, frambjóðanda til formanns Neytendasamtakanna. Þar kallaði hann meðal annars eftir því að Samkeppnisstofnunin fái „meiri völd“ og auknar rannsóknarheimildir til að „grafa betur“ í íslensku viðskiptalífi.

Meðal þess sem Þorsteinn telur að megi kanna betur er fataverslun á Íslandi. Fátt lýsi verðlagningu á þeim markaði betur en innreið fatakeðjunnar H&M, sem opnaði sína fyrstu verslun á Íslandi í ágúst í fyrra.

Frá opnun verslunarinnar var ljóst að verð H&M hér á landi yrðu hærri en í verslunum keðjunnar erlendis og var verðmunurinn í sumum tilfellum um 60 prósent.

H&M seldi föt á Íslandi fyrir um 2,5 milljarða króna í fyrra.Fréttablaðið/andri marínó
Þorsteinn segir ljóst að niðurfelling tolla og vörugjalda á fatnað í ársbyrjun 2016 hafi bersýnilega sýnt fram á að „álagningin hafi ekki verið þarna. Menn sjá það núna,“ segir Þorsteinn og bætir við að kaupmenn hafi þannig ekki skilað afnáminu til neytenda. Þrátt fyrir að fataverslunareigendur geti stærðar sinnar vegna fengið hagstæðari flutningskjör „borgar það sig samt“ fyrir fólk að versla föt sín á netinu og flytja þau sjálf inn.

Því sé víða pottur brotinn í íslenskri fataverslun, eins og koma H&M beri með sér. „Allt í einu kom hérna H&M - sem er himnaríki fyrir þá sem kaupa dálítið af fötum. Þau koma inn á markaðinn 30 prósent dýrari heldur en á Norðurlöndunum yfirleitt. Þetta bara sést á verðmiðanum hjá þeim,“ segir Þorsteinn. „Ég er ekki búinn að fara inn í þessa verslun, síðan að hún kom til Íslands. Mér dettur ekki í hug að fara þangað.“

Aðspurður hvort hann telji að mismunurinn liggi í flutningskostnaði til Íslands segir Þorsteinn að líklega spili hann einhverja rullu. Engu að síður veki hinn mikli verðmunur upp spurningar.

„Hvaðan ertu að flytja þennan fatnað? Kína, Indlandi, Filippseyjum - til Norðurlandanna. Það er dágóður spölur. Bíddu, er leggurinn hingað þá svona rosalega dýr?“ spyr Þorsteinn og bætir við: „Þá þurfum við að skoða flutningastarfsemina.“

Spjall þeirra Guðmundar og Þorsteins má heyra hér að neðan. Umræðan um H&M hefst þegar um 28 mínútur eru liðnar af spjallinu.


Tengdar fréttir

Hríðfallandi hagnaður eftir erfiða sex mánuði hjá H&M

Hagnaður sænska tískurisans H&M dróst saman um þriðjung á fyrri hluta rekstrarársins sem lauk í lok maí. Miklar óseldar vörubirgðir, of hraður vöxtur við opnun nýrra verslana og breytt neyslumynstur með aukinni netverslun hefur valdið fyrirtækinu tjóni.

Eiga ekki að „rétta hlut“ fyrirtækja hér

Forstjóri Samkeppniseftirlitsins segir eftirlitið ekki hafa hagsmuni af því að verja fyrri niðurstöður sínar. Eftirlitið verði að meta atvik í hverju og einu máli. Sérfræðingur í samkeppnisrétti segir að það verði að vera mögulegt fyrir fyrirtæki að bregðast við breytingum og nýrri samkeppni á hérlendum smásölumarkaði.






Fleiri fréttir

Sjá meira


×