Viðskipti innlent

Kumiko skellir í lás

Stefán Ó. Jónsson skrifar
Kumiko sérhæfði sig í litríkum kökum og öðrum myndrænum veitingum.
Kumiko sérhæfði sig í litríkum kökum og öðrum myndrænum veitingum. Vísir
Japanska te- og kökuhúsið Kumiko mun hætta rekstri í lok september. Kökulistakonan Sara Hochuli opnaði Kumiko á síðari hluta árs 2016 en segir að það sé með trega sem hún neyðist til að skella í lás úti á Granda.

Húsnæði Kumiko, sem áður hýsti Grandakaffi, hefur verið sett á sölu og til greina kemur að „selja rekstrarfélagið sem heldur á leyfum til veitingahúsarekstursins ásamt ýmsum tækjum og tólum sem þurfa til slíks reksturs eftir nánara samkomulagi,“ eins og það er orðað í fasteignaauglýsingunni.

Sara Hochuli er svissnesk kökulistakona, sem rak te- og kökuhúsið Kumiko.Myndir/Anton
Í tilkynningu á vef Kumiko segir Sara að Kumiko hafi verið „fjölskylduverkefni.“ Hún hefði aldrei náð að opna tehúsið ef ekki hefði verið fyrir stuðning fjölskyldu og vina.

Eftir andlát föður hennar í fyrra hafi því „allt breyst. Þetta er ekki eins án hans,“ skrifar Sara.

Hún hafi varið síðustu mánuðum í Zürich, þar sem hún rekur sambærilegt japanskt tehús.

Daglegur rekstur Kumiko hafi verið í höndum yfirbakarans, sem nú þarf að róa á önnur mið.

Án bakarans segir Sara að hún sjái sér ekki fært að reka Kumiko „með afslöppuðum hætti“ frá Sviss sem ennfremur ýtti undir ákvörðun hennar um að loka staðnum.

Nánari upplýsingar um Grandagarð 101 má nálgast á fasteignavef Vísis.

Eins og sjá má er litadýrðin í fyrirrúmi.
Flennistórt japanskt listaverk prýðir einn vegginn.
Dökkir og ljósir litir spila saman.
Fjólublátt skúmaskot.
Yfirbyggður pallur.
Og að sjálfsögðu er húsið einnig litríkt að utan.





Fleiri fréttir

Sjá meira


×