Viðskipti innlent

Kallar á frekari uppstokkun

Helgi Vífill Júlíusson skrifar
Væntingar Icelandair um að flugfargjöld hækki á árinu eftir hækkun á olíuverði munu ekki ganga eftir.
Væntingar Icelandair um að flugfargjöld hækki á árinu eftir hækkun á olíuverði munu ekki ganga eftir. Vísir/Getty

Eflaust verður Icelandair Group rekið ansi nálægt núllinu árið 2018. „Félagið mun væntanlega skila lítils háttar hagnaði miðað við afkomuspá stjórnenda Icelandair Group,“ segir Sveinn Þórarinsson, sérfræðingur í Hagfræðideild Landsbankans.

Hlutabréfaverð Icelandair Group lækkaði um fjórðung í gær í kjölfar afkomuviðvörunar á sunnudagskvöld. Í lok janúar fyrir ári birti flugfélagið sambærilega afkomuviðvörun og þá lækkuðu bréfin um 24 prósent. Verð bréfanna hefur ekki verið lægra síðan 28. janúar 2013.

Elvar Ingi Möller, sérfræðingur hjá greiningardeild Arion banka, segir að viðbrögðin á hlutabréfamarkaði hafi verið í takti við innihald afkomuviðvörunar félagsins.

Björgólfur Jóhannsson, forstjóri Icelandair Group, segir að spá félagsins um að meðalflugfargjöld myndu hækka á síðari hluta ársins virðist ekki ætla að ganga eftir. Auk þess hafi olíuverð hækkað um meira en 50 prósent á einu ári. „Meðal annars af þeim sökum lækkum við afkomu­spá félagsins,“ segir hann.

Sjá einnig: Forstjóri Icelandair stappar stálinu í starfsfólk sitt: „Ég veit að ég get treyst á ykkur öll“

Samkvæmt afkomuviðvöruninni mun EBITDA-hagnaður Icelandair Group – afkoma fyrir fjármagnsliði, skatta og afskriftir – verða 120 til 140 milljónir dala á þessu ári. Áður hafði félagið spáð EBITDA upp á 170 til 190 milljónir dala á árinu. Til samanburðar nam EBITDA félagsins 170 milljónum dala í fyrra.

„Það sem mestu skiptir er hvernig fyrirtækinu muni vegna til framtíðar. Aukin samkeppni hefur þrýst flugfargjöldum niður en félagið er vel í stakk búið til að takast á við hana. Það hafa verið gerðar viðamiklar breytingar á rekstrinum, þar á meðal hefur stjórnendum fækkað og reksturinn verið straumlínulagaður. Icelandair Group er stórt, þótt það sé lítið á heimsvísu, og það tekur alltaf einhvern tíma að innleiða breytingar en þar erum við á góðri leið,“ segir Björgólfur.

Sveinn segir að sú aðferðafræði að bíða og vona að fargjöld hækki hafi gengið sér til húðar eftir fyrsta ársfjórðung. Stjórnendur Icelandair Group hafi ekki gengið nógu langt í breytingum á rekstrinum. „Mig grunar að lággjaldaflugfélögin séu að halda flugfargjöldum niðri. Það þarf að bregðast við breyttu rekstrarumhverfi. Annars mun afkoman halda áfram að versna.“ Að þessu sögðu er fyrirtækið vel fjármagnað, að mati Sveins. „Lausafé fyrirtækisins er næstum 20 milljarðar króna.“

Missir markaðshlutdeild

Icelandair er jafnframt að missa markaðshlutdeild, að Sveins sögn. Fram kom í flutningatölum flugfélagsins að farþegum í júní hafi fækkað um 2 prósent á milli ára. „Tölurnar eru svipaðar á fyrstu sex mánuðum ársins. Það þýðir væntanlega að fyrirtækið er að missa markaðshlutdeild því ferðamönnum hefur fjölgað um 4-6 prósent á fyrstu sex mánuðum ársins. Fjöldi Íslendinga í flugvélum Icelandair jókst en samdráttur er í komu ferðamanna hingað til lands og á Norður-Atlantshafsmarkaðnum.“ 

Elvar Ingi segir að það hafi ekki endilega komið á óvart að Icelandair Group hafi sent út afkomuviðvörun. „Það sem kom hins vegar á óvart var hve mikið afkomuáætlun félagsins var lækkuð. Samhliða óhagstæðri þróun áhrifaþátta á rekstur félagsins á síðustu misserum, einkum hækkun á olíuverði, hefur það verið mikilvægt fyrir afkomu félagsins að verð á flugfargjöldum færi að hækka.“

Kergja er á meðal fjárfesta sem Fréttablaðið ræddi við í garð stjórnenda fyrirtækisins fyrir að hafa ekki gætt meiri varfærni við gerð afkomu­spár ársins. Byggst hafi upp væntingar sem varð síðan fljótlega ljóst þegar líða tók árið, einkum með farþegatölunum í apríl, að gætu tæpast gengið eftir.


Eiga yfir helming

Lífeyrissjóðir eiga 53 prósenta hlut í Icelandair Group miðað við lista yfir 20 stærstu hluthafa. Stærstur er Lífeyrissjóður verslunarmanna með 14 prósent. Markaðsvirði hlutabréfa lífeyrissjóðanna var 24 milljarðar króna við lok dags í gær og lækkaði um átta milljarða á einum degi.


Tengdar fréttir

Fyrstu merki samdráttar í ferðaþjónustu

Verðfall hlutabréfa í Icelandair Goup eru fyrstu staðfestu merki um samdrátt í ferðaþjónustu að mati prófessors í hagfræði við HÍ. Framkvæmdastjóri SAF segir tíma samþjöppunar fram undan. 15 milljarðar af markaðsvirði Icelandair þurrkuðust út í gær.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
MARL
0,13
5
93.108
VIS
0
3
9.252
ORIGO
0
1
5.125
SJOVA
0
6
57.051
TM
0
1
15.150

Mesta lækkun dagsins


Félag
Br.%
Fjöldi
Velta*
REGINN
-2,06
5
38.300
SIMINN
-1,84
5
90.353
N1
-1,65
6
126.050
REITIR
-1,52
3
54.714
SYN
-1,42
5
94.490
Velkomin á Vísi. Þessi vefur notar vafrakökur. Sjá nánar.