Menning

Íslandsvinirnir frá Harvard taka höndum saman með Bartónum

Tinni Sveinsson skrifar
Sprelligosarnir frá Harvard eru orðnir sannkallaðir Íslandsvinir.
Sprelligosarnir frá Harvard eru orðnir sannkallaðir Íslandsvinir.

Kórarnir Bartónar og The Harvard Din & Tonics taka höndum saman og halda glæsta tónleika í Gamla bíói annað kvöld.

Þetta er í annað skipti sem kórarnir halda saman tónleika en þeir gerðu það einnig fyrir tveimur árum við góðan orðstír.

Din & Tonics eru eitt af einkennismerkjum Harvard háskóla og er Reykjavík fyrsti viðkomstaður kórsins í tíu vikna tónlekaferð um Evrópu, Asíu og Ástralíu. Kórinn kom fyrst til Íslands 2010 og aftur 2016. Hann fagnar því á morgun endurkomu sinni og endurteknu samstarfi við Bartóna.

Dins syngja í hefðbundnum „a capella“ stíl þeirra vestanmanna og hafa gegnum árin gert garðinn frægan um allan heim með metnaðarfullum tónlistarflutningi, krydduðum með hnyttnum hreyfingum.

Tónlistina sækja þeir úr ýmsum áttum og má á efnisskránni finna sígilda djassslagara í bland við smelli frá hljómsveitum frá A-ha til Vulfpeck, allt er þetta flutt með kímnum blæ og bros á vör.

Bartónar hafa starfað í átta ár og hafa höfuðstöðvar sínar á Kaffibarnum. Það er væntanlega einsdæmi í heiminum að bar haldi úti heilum karlakór en þar af leiðandi rökrétt að sönghópur sem kennir sig við áfengan drykk leiti samstarfs við kórinn.

Bartónar hafa verið áberandi síðustu misseri, komu fram í þætti Amazing Race sem var tekinn upp á Íslandi, sungu í Kórum Íslands á Stöð 2 og tóku höndum saman með Emmsjé Gauta á Jülevenner tónleikaröðinni fyrir jól. Það er skammt stórra högga á milli hjá kórnum en á laugardag kemur hann fram á Humar sumri Kaffibarsins síðdegis.

Nánari upplýsingar um tónleikana annað kvöld er að finna á Tix.

Bartónar hafa verið iðnir við kolann síðustu misseri og halda nú tónleika bæði á fimmtudagskvöld og á laugardag.


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira