Salah leikmaður tímabilsins á Englandi

Egypski snillingurinn Mohamed Salah hefur verið útnefndur leikmaður ársins af EA Sports, aðalstyrktaraðila ensku úrvalsdeildarinnar.

Vandað er til verka hjá EA Sports en að valinu koma sérfræðingar, fyrirliðar ensku úrvalsdeildarliðanna auk þess sem hinn almenni stuðningsmaður fékk að taka þátt í valinu með netkosningu.

Salah hafði betur gegn Kevin De Bruyne, David De Gea, Harry Kane, Raheem Sterling og James Tarkowski. Egyptinn var sömuleiðis valinn bestur af leikmönnum ensku úrvalsdeildarinnar á dögunum.

Þessi 25 ára gamli sóknarmaður hefur komið sem stormsveipur inn í ensku úrvalsdeildina eftir að hafa áður reynt það en Salah átti misheppnaða dvöl hjá Chelsea áður en hann hélt til Roma, þaðan sem hann var svo keyptur til Liverpool síðastliðið sumar.

Salah hefur skorað 31 mark í ensku úrvalsdeildinni til þessa og getur enn bætt við mörkum þar sem Liverpool mætir Brighton á Anfield í lokaumferðinni í dag.