Viðskipti innlent

Hörður kaupir 32 sæta hraðfleyga skrúfuþotu

Kristján Már Unnarsson skrifar
Dornier 328-vélin var keypt í Þýskalandi. Stefnt er að því að hún verði farin að þjóna innanlandsfluginu í apríl.
Dornier 328-vélin var keypt í Þýskalandi. Stefnt er að því að hún verði farin að þjóna innanlandsfluginu í apríl. Mynd/Hörður Guðmundsson.

Flugfélagið Ernir hefur keypt 32 sæta hraðfleyga skrúfuþotu. Eigandinn, Hörður Guðmundsson, stefnir á tvær til þrjár slíkar, bæði til nota á innanlandsleiðum og í leiguflugi til nágrannalanda. Rætt var við Hörð í fréttum Stöðvar 2. 

Það var árið 1969, fyrir 49 árum, sem Hörður Guðmundsson hóf flugrekstur og þá byrjaði hann með sex sæta Cessnu 185. Nú er hann búinn kaupa stærri vél en nokkru sinni fyrr; Dornier 328. 

Hörður Guðmundsson, forstjóri og eigandi Flugfélagsins Ernis. Hann státar af því að vera með elstu kennitöluna í flugrekstri innanlands. Stöð 2/Björn Sigurðsson.

„Það er fjölgun í innanlandsfluginu. Það er vaxandi áhugi erlendra ferðamanna að komast beint út á land frá Reykjavík og sleppa öngþveitinu á höfuðborgarsvæðinu,“ segir Hörður. 

„Yfir vetrarmánuðina líka þá er vaxandi hópur fólks sem nýtir sér einmitt flugið til þess að þurfa ekki að vera á varasömum vegum við erfiðar aðstæður.“ 

Fjórar Jetstream-skrúfuþotur Ernis þykja hraðfleygar á 420 kílómetra hraða en nýja vélin flýgur á 620 kílómetra hraða. Jetstream-vélarnar taka 19 farþega en sú nýja 32 farþega. Hörður vonast til að hún verði komin í rekstur innan tveggja mánaða á helstu innanlandsleiðum.

Jetstream-skrúfuþota á Hornafjarðarflugvelli. Fjórar slíkar hafa haldið uppi innanlandsflugi Ernis. Stöð 2/Arnar Halldórsson.

„Húsavík verður áfram vaxandi og Hornafjörður. Svo eru Vestmannaeyjar. Við erum að fljúga á Vestmannaeyjar 3-4 ferðir á dag núna eiginlega alla daga.“ 

Einnig geti Dornier-vélin flogið fullhlaðin með 32 farþega á Bíldudal meðan Jetstream-vélarnar geti aðeins tekið tíu farþega þangað vegna stuttrar brautar. Auk fyrrgreindra staða er Ernir með áætlunarflug til Sauðárkróks og Gjögurs.

Hörður sér líka tækifæri í leiguflugi til nágrannalanda. Nýja vélin opni fjölda flugvalla, bæði á Grænlandi og í Norður-Noregi.

Dornier-vélin sem Flugfélagið Ernir hefur keypt. Hún flýgur á 620 kílómetra hraða. Mynd/Hörður Guðmundsson.

En Hörður hyggst ekki láta eina Dornier duga. 

„Markmiðið er kannski til að byrja með tvær vélar á næstu kannski tveimur árum eða svo. En við getum líka séð fram á það, ef við skiptum núverandi flota út, þá gætum við rekið þessa áætlun okkar með þremur stærri vélum.“

Dornier-skrúfuþotan er innréttuð með 32 farþegasætum. Það þýðir að félagið þarf að ráða flugfreyjur. Mynd/Hörður Guðmundsson.

Hörður segir að það sé á mörkunum að hin litla flugstöð Ernis á Reykjavíkurflugvelli dugi þegar stóra vélin kemur í apríl. 

„Það eru allsstaðar ágætis flugstöðvar úti um allt land nema í Reykjavík. Það er bara til háborinnar skammar fyrir flugvöllinn bara, myndi ég segja, að það hafi ekki verið hægt að byggja hér upp sómasamlega aðstöðu, öll þessi ár.“ 

Hér má sjá frétt Stöðvar 2:


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
HAGA
0,5
3
32.990
MARL
0,26
1
5.582
SIMINN
0
2
55.000

Mesta lækkun dagsins


Félag
Br.%
Fjöldi
Velta*
HEIMA
-4,03
15
19.923
REITIR
-0,63
3
12.487
SJOVA
-0,31
1
16.000
REGINN
-0,22
1
544
SIMINN
0
2
55.000