Viðskipti innlent

Bindisamningar líkamsræktarstöðva koma mörgum í koll

Hersir Aron Ólafsson skrifar
Sprenging verður gjarnan í kortakaupum hjá líkamsræktarstöðvum landsins eftir jól og áramót.
Sprenging verður gjarnan í kortakaupum hjá líkamsræktarstöðvum landsins eftir jól og áramót. Vísir/ernir
Bindisamningar líkamsræktarstöðva geta komið mörgum í koll þegar líður að nýju ári. Þetta segir framkvæmdastjóri Neytendasamtakanna, en algengt er að árskort endurnýist sjálfkrafa ef þeim er ekki sagt upp. Dæmi eru um að viðskiptavinir hafi óafvitandi greitt fyrir margra ára áskrift þó þeir telji sig hafa sagt henni upp.

Sprenging verður gjarnan í kortakaupum hjá líkamsræktarstöðvum landsins eftir jól og áramót. Algengt er því að árskort sem keypt hafa verið renni út á þessum tíma. Aftur á móti er ekki sjálfgefið að áskriftinni ljúki þó ár hafi runnið sitt skeið.

Sat í súpunni sex árum síðar

Brynhildur Pétursdóttir, framkvæmdastjóri Neytendasamtakanna, bendir á að stöðvarnar séu gjarnan með strangar reglur um skriflega uppsögn. Nefnir hún nýlegt dæmi þar sem viðskiptavinur sagði samningi upp við starfmann munnlega, en sat svo í súpunni um sex árum síðar.

„Starfsmaður tók við uppsögninni en síðan líður og bíður og svo kemst viðkomandi að því að hann er enn að greiða fyrir einhverja þjónustu sem hann hefur ekki notað í mörg ár. Þá er ekkert annað að gera en að skoða kreditkortayfirlitið á hverjum einasta mánuði þar sem um leið og maður er búinn að borga kreditkortareikninginn þá er maður búinn að samþykkja einhverja þjónustu. Þá er erfitt að krefjast endurgreiðslu,“ segir Brynhildur.

Eigi að geta verið á hvaða formi sem er

Brynhildur segir ekki ólöglegt að krefjast skriflegrar uppsagnar. Aftur á móti hafi sum fyrirtæki gert enn strangari kröfur sem ekki standist skoðun. „Til dæmis eins og eitt fyrirtæki, Reebok Fitness, sem við vitum um alla vega, er að gera þá kröfu að uppsögn verði að fara fram í gegnum heimasíðu fyrirtækisins. Við teljum að það geti ekki staðist og sé alltaf best fyrir fólk að gera þetta skriflega eða í tölvupósti.“

Þannig segir hún að skrifleg uppsögn eigi að geta verið á hvaða skriflega formi sem er. „Ef ég ákveð að ég vilji gera það með handskrifuðu bréfi þá er ekki hægt að meina mér það,“ segir Brynhildur Pétursdóttir.






Fleiri fréttir

Sjá meira


×