„Versta ákvörðun Drinkwaters á ferlinum“

Danny Drinkwater, leikmaður Chelsea, skoraði sjálfsmark þegar hann afþakkaði sæti í enska landsliðshópnum. Þetta segir Chris Sutton, fyrrverandi leikmaður Blackburn Rovers, Chelsea og fleiri liða.

Sutton talar af reynslu en hann neitaði að spila fyrir B-lið Englands árið 1998. Hann segir í pistli á vefsíðu Daily Mail að það hafi verið stærstu mistök sín á ferlinum. Og nú sé Drinkwater að leika sama leik.

Sutton segir að möguleikar Drinkwaters á að spila á HM í Rússlandi séu úr sögunni og Gareth Southgate og landsliðsþjálfarar Englands í framtíðinni muni ekki snerta við honum.

Sutton segir ennfremur að það hafi verið sniðugt fyrir Drinkwater að gefa kost á sér í landsliðið til að fá spiltíma, sem hefur verið lítill hjá Chelsea, aðallega vegna meiðsla.

Í stað þess að sanna sig í leikjum gegn Þýskalandi og Brasilíu fái Drinkwater bara að spila í deildabikarnum og með varaliði Chelsea.

 

Drinkwater, sem var í lykilhlutverki í meistaraliði Leicester City tímabilið 2015-16, spilaði þrjá landsleiki fyrir England í fyrra. Hann var hins vegar ekki valinn í lokahópinn fyrir EM í Frakklandi.