Innlent

Stærsta húsið rís í mestu fjárfestingum Eyjamanna

Kristján Már Unnarsson skrifar

Fjárfestingar í sjávarútvegi Vestmannaeyja hafa aldrei verið meiri og fara yfir tíu milljarða króna á þriggja ára tímabili. Meðal annars reisir Vinnslustöðin frystigeymslu sem verður langstærsta hús Eyja. Í fréttum Stöðvar 2 var fjallað um fjárfestingar tveggja stærstu fyrirtækjanna og rætt við Sigurgeir Brynjar Kristgeirsson, framkvæmdastjóra Vinnslustöðvarinnar hf. 

Glöggir menn telja að aldrei hafi verið fjárfest jafn mikið í sjávarútvegi í Vestmannaeyjum og um þessar mundir. Ný vinnsluhús spretta upp, ný fiskiskip koma og nú er að rísa stærsta hús sem menn hafa séð í Eyjum, fyrr og síðar. 

Þetta er frystigeymsla Vinnslustöðvarinnar, sem rís á Eiðinu, fjögurþúsund fermetrar að grunnfleti og ellefu metra há. Verið var að steypa gólfin þegar framkvæmdastjórinn sýndi okkur húsið og við fengum þá tilfinningu að það væri svo stórt að þar mætti koma fyrir ágætis knattspyrnuvöllum. 

Séð yfir Vestmannaeyjahöfn. Nýja frystigeymslan er austast á Eiðinu, hægra megin, næst Heimakletti. Stöð 2/Arnar Halldórsson.

„Þetta er nú kannski þannig að reksturinn snýst meira um byggingastarfsemi í augnablikinu heldur en útgerð,” segir Binni í Vinnslustöðinni. 

Og það eru orð að sönnu því hvarvetna á hafnarsvæðinu mátti sjá iðnaðarmenn að störfum fyrir Vinnslustöðina. Verið er að byggja 1.800 fermetra uppsjávarfrystihús og mótorhús, löndunarhús, nýir mjölturnar hafa verið að spretta upp hver af öðrum og svo er komin hér 2.600 fermetra mjölgeymsla. Í nýjum byggingum er þetta fjárfesting upp á þrjá og hálfan milljarð króna. 

„Megnið af húsakosti Vinnslustöðarinnar var um það bil fimmtíu ára og tækjabúnaður í uppsjávarvinnslu kannski að verulegu leyti 25-30 ára. Þannig að það var bara kominn tími, - við gátum ekki keyrt okkar gömlu hús og tæki lengur. Það var bara kominn tími til þess að endurnýja.” 

Rekstur Vinnslustöðvarinnar snýst kannski meira um byggingarstarfsemi heldur en útgerð þessa dagana, segir framkvæmdastjórinn. Stöð 2/Arnar Halldórsson.

Öll vinnsla á síld, loðnu, makríl og kolmunna er að færast úr gömlum húsum um leið og nýjasta tækni er tekin í gagnið, sem vonast er til að skili betri og verðmætari afurðum. 

„Við erum að fara úr gamla tímanum í framtíðina,” segir Binni. 

Jafnframt er Vinnslustöðin að fá nýjan togara frá Kína síðar í sumar eftir að hafa keypt tvö skip af Granda, auk loðnukvóta. 

„Þannig að samtals eru þetta á milli sjö til átta milljarðar sem við erum að fjárfesta fyrir á þessum þremur árum.”

Séð inn í eina álmu nýju frystigeymslu Vinnslustöðvarinnar. Stöð 2/Arnar Halldórsson.

Þá hefur Ísfélag Vestmannaeyja einnig staðið í miklum framkvæmdum í Eyjum, upp á tvo til þrjá milljarða króna, að sögn Stefáns Friðrikssonar framkvæmdastjóra; byggt nýja frystigeymslu, flokkunarstöð og endurnýjað löndunaraðstöðu. 

Þessar miklu fjárfestingar segja sitt um trú manna á útgerðarstöðinni Vestmannaeyjum. 

„Þetta hefur alltaf verið kraftmikil útgerð og við róum að því öllum árum að svo verði áfram,” segir Sigurgeir Brynjar.


Tengdar fréttir



Fleiri fréttir

Sjá meira