Innlent

Metin hæfust til að verða dómarar við Landsrétt

Sunna Kristín Hilmarsdóttir skrifar
Vilhjálmur H. Vilhjálmsson, Hervör Þorvaldsdóttir, Davíð Þór Björgvinsson og Kristbjörg Stephensen.
Vilhjálmur H. Vilhjálmsson, Hervör Þorvaldsdóttir, Davíð Þór Björgvinsson og Kristbjörg Stephensen.

Listi yfir þá 15 einstaklinga sem hæfnisnefnd telur hæfasta til að gegna embætti dómara við Landsrétt hefur verið sendur umsækjendum og var hann birtur á Kjarnanum í dag. Nefndin er þó enn að störfum og hefur ekki skilað ráðuneytinu skýrslu sinni. Umsækjendur hafa nú tækifæri til að koma athugasemdum sínum á framfæri við nefndina.
 
Samkvæmt lögum um dómstóla er dómsmálaráðherra óheimilt að skipa í dómaraembætti einstakling sem hæfnisnefndin hefur ekki talið hæfastan meðal umsækjenda.

Frá þessu er þó hægt að víkja ef Alþingi samþykkir tillögu ráðherra um heimild til að skipa í embættið annan nafngreindan umsækjanda „sem fullnægir að mati dómnefndar öllum skilyrðum til að hljóta skipun í embættið,“ að því er segir í lögunum.

Fimm konur og tíu karlar eru á lista hæfnisnefndarinnar en þar á meðal eru héraðsdómarar, borgarlögmaður og hæstaréttarlögmenn:

1.    Aðalsteinn E. Jónasson, hæstaréttarlögmaður
2.    Ástráður Haraldsson, hæstaréttarlögmaður
3.    Davíð Þór Björgvinsson, prófessor við lagadeild Háskóla Íslands
4.    Eiríkur Jónsson prófessor, við lagadeild Háskóla Íslands
5.    Hervör Þorvaldsdóttir, héraðsdómari
6.    Ingveldur Einarsdóttir, settur hæstréttardómari
7.    Jóhannes Rúnar Jóhannsson, hæstaréttarlögmaður
8.    Jóhannes Sigurðsson, hæstaréttarlögmaður
9.    Jón Höskuldsson, héraðsdómari
10.    Kristbjörg Stephensen, borgarlögmaður
11.    Oddný Mjöll Arnardóttir, prófessor við lagadeild Háskóla Íslands
12.    Ragnheiður Harðardóttir, héraðsdómari
13.    Sigurður Tómas Magnússon, atvinnulífsprófessor við lagadeild Háskólans í Reykjavík
14.    Vilhjálmur H. Vilhjálmsson, hæstaréttarlögmaður
15.    Þorgeir Ingi Njálsson, dómstjóri við Héraðsdóm Reykjaness

Lög um stofnun millidómsstigs voru samþykkt á Alþingi í maí í fyrra. Með lagabreytingunni verða dómstigin í landinu þrjú, það er héraðsdómstólar, Landsréttur og Hæstriéttur en um leið voru gerðar verulegar breytingar á stjórnsýslu dómstólanna.

Með Landsrétti á að reyna að tryggja milliliðalausa sönnunarfærslu á tveimur dómsstigum. Landsréttur á að taka til starfa þann 1. janúar 2018.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira