Viðskipti erlent

Kínverjar heita milljörðum í efnahagssamstarf til eflingar fríverslunar

Oddur Ævar Gunnarsson skrifar
Xi Jinping, forseti Kína, var bjartsýnn á ráðstefnunni um helgina.
Xi Jinping, forseti Kína, var bjartsýnn á ráðstefnunni um helgina. Vísir/EPA

Forseti Kína, Xi Jinping, hét því í dag að Kína muni verja 124 milljörðum bandaríkjadollara í svokallað „Silkivegarsamstarf“ þar sem áhersla verður lögð á að efla fríverslun Kínverja og byggja upp innviði ríkja og leggja í framkvæmdir líkt og byggingu hafna, vega og járnbrautateina í þeim ríkjum sem taka þátt í samstarfinu. BBC greinir frá. 

Með áætluninni ætla Kínverjar sér að efla fríverslun á milli Asíu, Afríku, Evrópu og víðar en hulunni var fyrst svipt af planinu árið 2013.

Forsetinn ávarpaði leiðtoga 29 ríkja sem samankomnir voru í dag í Peking á sérstakri efnahagsráðstefnu í tilefni áætlana Kínverja og haldin var um helgina. 

Með áætluninni ætlum við okkur ekki að feta gamlar slóðir einhverskonar leikja á milli andstæðinga heldur ætlum við okkur að byggja nýtt módel samstarfs og sameiginlegra hagsmuna.
Hann segir að alþjóðasamfélagið verði að búa til aðstæður sem ýta undir efnahagsþróun ríkja þar sem fríverslun ræður ríkjum.

Meðal leiðtoga á ráðstefnunni eru Vladimír Pútín, forseti Rússlands og Receeyip Erdogan, forseti Tyrklands og tóku þeir báðir vel í áætlun Kínverja.

Leiðtogar nágrannaríkja líkt og Japans og Indlands hafa hins vegar haldið sig frá ráðstefnunni enda hafa þjóðirnar lengi átt í stirðum samskiptum á alþjóðavettvangi.

Líta þjóðirnar svo á að Kínverjar vilji með þessum áætlunum festa sig í sessi og tryggja áhrif sín yfir öðrum ríkjum á alþjóðavettvangi.

Xi Jinping gefur þó lítið fyrir slíkar áhyggjur og segir að Kínverjar ætli sér á engan hátt að skipta sér af innanríkismálum annarra landa. Um sé að ræða samstarf sem geti hagnast öllum aðilum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira