Erlent

Auðar blaðsíður á toppi metsölulista Amazon

Bókarhöfundur telur enga ástæðu til þess að kjósa demókrata eins og Hillary Clinton (t.v.) eða Bernie Sanders (t.h.)
Bókarhöfundur telur enga ástæðu til þess að kjósa demókrata eins og Hillary Clinton (t.v.) eða Bernie Sanders (t.h.) Vísir/AFP

Mest selda bókinn á verslunarvefnum Amazon í Bandaríkjunum þessa stundina er 266 blaðsíðna löng en fyrir utan efnisyfirlitið er hver einasta síða auð. Titill bókarinnar er „Ástæður til að kjósa demókrata: Ítarleg handbók“.

Bókin er hugarfóstur sagnfræðingsins og íhaldsmannsins Michaels J. Knowles sem skrifaði hana til að henda gaman að demókrötum í Bandaríkjunum. Bókin hefur hins vegar selst í meira en 60.000 eintökum á innan við viku.

„Þegar bókin seldist í hundrað eintökum var þetta fyndinn brandari. Þegar hún seldist í fimm þúsund eintökum var þetta mjög fyndinn brandari. Þegar hún seldist í 50.000 eintökum fékk það mig til að hugsa og velta fyrir mér um hvar menning okkar er stödd,“ segir Knowles við Washington Post.

Höfundurinn telur engu að síður að hugmyndin að bókinni eigi rétt á sér. Bandarískra vinstrið hafi tortýmt sjálfu sér og kjörþokka sínum með því að standa ekki fyrir neitt. Donald Trump hafi aftur á móti sýnt að góð kímnigáfa skili mönnum langt í stjórnmálum og mikil þörf sé á henni.

Bók Knowles er hins vegar ekki sú fyrsta sem nær árangri á metsölulista Amazon þrátt fyrir að vera nær algerlega auð. Sambærileg bók sem gerði grín að Donald Trump kom út fyrir fjórum mánuðum. Sú bar titilinn „Ástæður þess að Trump verðskuldar traust, virðingu og aðdáun“. Hún var sömuleiðis auð og hefur selst í meira en 20.000 eintökum fram að þessu.

Bókin er á toppi metsölulista Amazon þessa stundina. Skjáskotið er frá 18. mars 2017. Skjáskot/Amazon



Fleiri fréttir

Sjá meira