Innlent

Systur árásarmannsins: „Búnar að bíða eftir þessu í tvö ár“

Erla Björg Gunnarsdóttir skrifar

Maður á þrítugsaldri situr í mánaðarlöngu gæsluvarðhaldi eftir að hafa barið mág sinn ítrekað í höfuðið með hamri á nýársnótt. Mágur hans er marghöfuðkúpubrotinn og liggur þungt haldinn á gjörgæslu.

Systur mannsins segja ekkert tilefni hafi verið til árásarinnar. Mennirnir tveir séu vinir en að bróðir þeirra eigi við geðræn vandamál að stríða vegna langvarandi fíkniefnaneyslu. Hann hafi verið í mikilli neyslu síðustu tvær vikur, ekkert sofið og ekkert borðað, og hafi haldið að mágur hans væri að reyna að drepa hann. Slíkar ranghugmyndir hafi ekki verið óalgengar síðustu ár.

„Við höfum barist við geðdeildina í tvö ár. Hann hefur bæði farið sjálfur og við með honum en hann er alltaf sendur heim því hann er í þessu ástandi, undir áhrifum,“ segir Theódóra Bragadóttir, systir mannsins.

Sjá einnig: Árásin í Gerðunum: Barði mág sinn ítrekað í höfuðið með hamri

Guðbjörg Sif Sigrúnardóttir, önnur systir hans, segir lögregluna ekki heldur geta gert nokkuð enda komi hún einnig að lokuðum dyrum upp á geðdeild. „Við erum búin að bíða eftir þessu í tvö ár. Þetta er eins og að horfa á bílslys gerast hægt í tvö ár,” segir hún.

Yngsta systirin situr yfir manni sínum á gjörgæslu sem er alvarlega slasaður og ljóst að næstu misseri verði erfið fyrir fjölskylduna. Systurnar segja álagið á fjölskylduna hafa verið mikið um nokkurt skeið enda fari bróðir þeirra reglulega í geðrof. Þau upplifi mikinn vanmátt, úrræðaleysi og hafi sífelldar áhyggur.

„Ég er ekki að réttlæta það sem hann gerði. En við viljum koma fram því ef þetta getur hjálpað einni annarri manneskju þá er ég sátt. Að einhver þarna úti komi ekki líka að lokuðum dyrum,” segir Guðbjörg.

Theódóra bætir við að það sé skelfilegt að einhver þurfi að stórslasast eða deyja til að eitthvað sé gert fyrir fólk. „Það er líka slæmt að lögreglan sé úrræðalaus. Löggan hefur sagt við mig að það eina sem hægt sé að gera þegar hann er í geðrofi sé að setja hann í fangelsi.”

Guðbjörg segir síðan fjölskylduna sitja uppi með vandann. „Maður er sendur heim með mann í þessu ástandi, með börn og fjölskyldu heima, og maður veit ekki hvað getur gerst. Hvort hann ráðist á einhvern og svo spyr hann í sífellu hvað hann hafi gert, hvort maður hafi drepið hann og sakar fólk um ofbeldi. Maður veit ekki hvernig á að bregðast við.“

Bróðirinn er nú á Litla-Hrauni í löngu gæsluvarðhaldi vegna alvarleika málsins og systurnar segja ljóst að hans bíði fangelsisdómur.

„En það er ekki það versta í þessu öllu saman. Þá er hann allavega öruggur í fangelsi,” segir Guðbjörg og Theódóra bætir við: „Það er ekki öryggi hérna úti, hvorki fyrir hann né aðra sem umgangast hann.“


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.