Erlent

Taka ekki þátt í friðarviðræðunum

Riad Hijab, fyrrverandi forsætisráðherra Sýrlands.
Riad Hijab, fyrrverandi forsætisráðherra Sýrlands. vísir/afp

Fulltrúar sýrlensku stjórnarandstöðunnar ætla ekki að taka þátt í friðarviðræðum um Sýrlandsstríðið sem eiga að hefjast í Genf á morgun. Þeir segjast fyrst þurfa að ná samkomulagi um að loftárásum á hernumdum svæðum verði hætt.

Riad Hijab, fyrrverandi forsætisráðherra Sýrlands, sem fer fyrir hópnum, sagði í yfirlýsingu sinni að stjórnarandstaðan myndi ekki mæta á fundinn nema kröfum hennar yrði mætt. Samninganefnd stjórnvalda hefur boðað komu sína en talið er ólíklegt að samkomulag náist á milli stjórnar- og stjórnarandstöðu.

Bundnar hafa verið verið vonir við að skriður kæmist á friðarumleitanir í Sýrlandi, en Staffan de Mistura, erindreki Sameinuðu þjóðanna, hefur lýst því yfir að þessi fundur sé líklega síðasta tækifæri Sýrlendinga til að koma á friði.

Erfiðlega hefur gengið að koma stríðandi fylkingum að samningaborðinu. Fyrsta tilraun til að halda friðarviðræður fyrir tveimur árum bar ekki árangur, en stríðið hefur nú staðið yfir frá árinu 2011. Þá var stefnt að því að hefja þær 25. þessa mánaðar en var frestað um fjóra daga vegna deilna um skipan í samninganefndir.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira