Kúnnar þakklátir fyrir starfsmanninn á plani

Fyrir nokkrum árum fjölgaði sjálfsölum verulega á bensínstöðvum sem æ fleiri nýttu sér til að spara bensínkostnað. En það eru alltaf einhverjir sem vilja heldur þjónustuna, hvort sem það er að setja bensín á bílinn eða athuga með olíuna, og á höfuðborgarsvæðinu eru 35 bensínstöðvar sem enn bjóða upp á slíka þjónustu.

Í samtali við Olís, Skeljung og N1 kom fram að öll fyrirtækin leggi upp úr þjónustu við viðskiptavini og ekki er séð fram á að sjálfsalinn muni alfarið taka við af þjónustunni. Áhersla á þjónustu starfsmanna á plani hefur þó farið minnkandi vegna minnkandi eftirspurnar. Fyrir um ári síðan byrjaði Skeljungur að bjóða upp á jafn dýrt bensín, í sjálfsafgreiðslu og þjónustu, og þá kom í ljós að kúnnarnir vilja gjarnan þiggja þjónustuna.

Guðmundur Benjamín Jóhannesson starfar við útiþjónustu á Stöðinni á Birkimel í Vesturbænum. Ófá þakkarbréf hafa verið send til stjórnenda Skeljungar þar sem einstök þjónustulund hans er lofuð. Guðmundur kannast vel við það að fólk sé þakklátt fyrir þjónustuna. „Maður minnir á frostlöginn, býðst til að athuga með vatnið og olíuna, bendir því á að rúðuþurrkurnar eru handónýtar og býðst til að skipta, athugar með loft í dekkjum og svo framvegis. Þetta er eitthvað sem fólk kann virkilega vel að meta. Svo þegar það er vont veður þá finnst því voða notalegt að fá þjónustu og geta verið inni í hlýjum bíl.“

Guðmundur hefur unnið á bensínstöðinni í fimmtán ár og gegnt ýmsum störfum en skemmtilegast þykir honum að vera í þjónustunni úti við. „Útiveran hentar mér vel. Maður hefur alla lóðina til að rölta um og teygja á sér. Svo er gaman að hitta skemmtilega kúnna og maður er farinn að þekkja fastakúnnana ansi vel. Maður er bara tilbúinn með þjónustuna og vöruna þegar þeir koma því maður veit hvað þeir vilja. Við erum eiginlega eins og lítil fjölskylda hérna, sama starfsfólkið búið að vera lengi og allir þekkja alla.“

Á tímabili fyrir nokkrum árum stóð til að þjónusta á stöðinni myndi hætta og var þjónustan takmörkuð verulega. „Þá var fólk ekki alveg sátt enda mikið af eldra fólki sem kemur og treystir á að við förum aðeins yfir bílinn yfir góðu spjalli,“ segir Guðmundur.