Viðskipti innlent

Aðeins fjórar evrópuþjóðir hafa verri skuldastöðu

Þorbjörn Þórðarson skrifar
Seðlabanki Íslands
Seðlabanki Íslands

Á tæpum þremur árum hafa skuldir ríkissjóðs hækkað um fjögur hundruð milljarða króna og eru núna 1.900 milljarðar. Aðeins fjórar Evrópuþjóðir hafa verri skuldastöðu ríkisins en Ísland.

Forystumenn ríkisstjórnarinnar hafa ítrekað á undanförnum mánuðum barið sér á brjóst fyrir góðan árangur í ríkisfjármálum svo ætla mætti að skuldastaða ríkissjóðs væri mjög góð. En hver er staðan?

Eins og sést á töflu í myndskeiðinu hér að ofan jukust skuldir ríkisins mikið í hruninu en fóru svo niður í rúmlega 1500 milljarða króna í mars 2010.Síðan þá, á tæpum þremur árum, hafa skuldir ríkissjóðs hins vegar hækkað um rúmlega fjögur hundruð milljarða króna og námu rúmlega 1900 milljörðum króna í október síðastliðnum.

Það er tæplega 120 prósent af vergri landsframleiðslu Íslands.

Í tölfræði frá Eurostat, Hagstofu Evrópusambandsins, fyrir skuldir þjóðríkja á árinu 2011, sem sjá má í myndskeiðinu hér að ofan, sést að aðeins fjögur ríki Evrópu hafa hærri skuldir ríkissjóðs en Ísland. Þetta eru Grikkland, Írland, Ítalía og Portúgal.

Inni í skuldatölunni hér framar eru einnig lífeyrisskuldir ríkissjóðs. Séu þær teknar út eru skuldirnar um 1500 milljarðar króna sem er 88 prósent af landsframleiðslunni.

Þá er rétt að hafa í huga þegar rætt er um árangur í ríkisfjármálum að afkoma ríkissjóðs hefur batnað nokkuð að undanförnu.

Svokallaður frumjöfnuður er skilgreindur sem jöfnuður tekna og gjalda að vaxtatekjum og vaxtagjöldum undanskildum. Halli á frumjöfnuði fór úr 6,5 prósent af landsframleiðslu árið 2009 í það að vera jákvæður um rúmlega 2 prósent á síðasta ári samkvæmt áætlun.

Auk þess hafa komið til einskiptis greiðslur vegna afskrifta sem hafa, ásamt bókfærðum hallarekstri, aukið skuldir ríkissjóðs. Þá er rétt að hafa í huga að nokkrar eignir eru á móti þessum skuldum, meðal annars í gjaldeyrisforða.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira