Dómarinn telur drengnum engin hætta búin í Noregi

Héraðsdómur Reykjavíkur tók ekki til greina skýrslu sálfræðings sem lögð var fram í máli Elvu Christinu, móður fimm ára drengs sem senda á til Noregs samkvæmt nýföllnum dómi. Dómari í málinu leitaði sjálfur aðstoðar sérfræðings sem kannaði viðhorf barnsins til þess hvar það vildi sjálft vera. Samkvæmt dómi sem féll í Noregi vegna málsins ber Elvu að afhenda norskum yfirvöldum son sinn og fær hún ekki að hitta hann í fjórtán ár, nema tvisvar á ári undir eftirliti.

Í niðurstöðu dómsins segir að skýrsla sálfræðingsins, sem Elva Christina lagði fram, hafi verið einhliða lögð fram af henni sjálfri og án allrar aðkomu barnaverndaryfirvalda í Noregi. Sálfræðingurinn mat það sem svo að drengurinn vildi búa hjá fjölskyldu sinni á Íslandi.

Drengurinn sagðist vilja vera hjá fjölskyldu sinni

Sérfræðingur í klínískri barnasálfræði, sem dómurinn leitaði til, mat það sem svo að drengurinn hefði ekki náð þeim þroska að hann hefði yfirsýn yfir né skildi stöðu sína að því marki að geta tekið afstöðu til þess hvort hann vildi vera á Íslandi eða vandalausum í Noregi. Í skýrslu sérfræðingsins kemur hins vegar fram að drengurinn vilji vera hjá ömmu sinni og mömmu, auk tveggja annarra ættingja.

Sjá einnig:„Ég veit ekki hvað ég geri ef þau taka hann“

„Að mati dómsins hefur ekkert komið fram í málinu sem hnekkir þessu mati sálfræðingsins á vægi skoðana drengsins, sem eru í samræmi við það sem almennt má vænta af fimm ára barni í þessari stöðu,“ segir í niðurstöðu dómsins.

Forsaga málsins er sú, líkt og Vísir hefur greint frá, að Elva Christina var búsett í Noregi með syni sínum frá árinu 2013. Félagsmálayfirvöld í Noregi höfðu afskipti af Elvu í lok árs 2013 og var hún svipt rétti til umönnunar barnsins í maí síðastliðnum. Elva Christina hefur glímt við áfengisvanda, sem hún segist nú hafa tekist á við.

Eftir uppkvaðningu úrskurðarins flúði amma drengsins, Helena Brynjólfsdóttir, með hann til Íslands sem að mati héraðsdóms var gert á ólögmætan hátt.

Sjá einnig:Ömmunni neitað um sálfræðimat

Óljós og ruglingslegur úrskurður

Við meðferð málsins bar lögmaður Elvu Christinu því við að úrskurður norskra yfirvalda sé óljós og ruglingslegur og að ekki verði ráðið af lestri hans hvert raunverulegt inntak hans sé. Honum hafi verið snarað yfir á íslensku í miklum flýti og að þýðingin hafi líklega ekki verið gerð af löggiltum skjalaþýðanda. Hann geti því vart talist réttmætur í máli sem varði svo mikilvæga hagsmuni. Þessu var dómurinn þó ekki sammála.

Hann sagði jafnframt að drengnum líði vel á Íslandi, sé náinn fjölskyldu sinni og alinn upp meðal Íslendinga við íslenskt móðurmál og menningu. Veruleg hætta sé á því að afhending muni skaða drenginn andlega.

Ekkert bendi til að afhendingin muni skaða barnið

Dómurinn taldi hins vegar ekkert renna stoðum undir það að alvarleg hætta sé á að afhending muni skaða barnið andlega eða líkamlega eða koma því á annan hátt í óbærilega stöðu, líkt og það er orðað í niðurstöðu dómsins. Jafnframt taldi dómurinn ekki efni til að fallast á kröfu lögmanns Elvu Christinu þess efnis að ef til áfrýjunar komi sé ástæða til að fresta því að drengurinn verði fluttur til Noregs.

Tveir þingmenn hafa lýst yfir áhyggjum af málinu, þau Ragnheiður Ríkharðsdóttir, þingflokksformaður Sjálfstæðisflokksins, og Kristján Möller, þingmaður Samfylkingarinnar, en þau eru sammála um það að mannréttindamál sé að ræða. Ragnheiður hefur skorað á flokksystur sína, Ólöfu Nordal innanríkisráðherra, að grípa inn í atburðarásina. Þá segir Kristján að þetta sé nútíma barnarán af norskum yfirvöldum.

„Þetta má aldrei gerast. Virðulegi forseti, ég hef oft komið í þennan ræðustól á sautján ára þingferli mínum. Ég hef hins vegar aldrei áður fengið sting í hjartað við það að ræða mál og ég fer sorgmæddur úr þessum ræðustól,“ sagði Kristján Möller á Alþingi.

Norska barnaverndin hefur verið gagnrýnd harðlega, en í þætti Dateline var skyggnst bak við tjöldin þar sem fylgst var með aðferðum hennar með notkun falinna myndavéla, líkt og sjá má hér.