Bryndís ætlar að ganga til samninga við huldumanninn

Bryndís Kristjánsdóttir skattrannsóknarstjóri segir að gengið verði til samninga við seljanda gagna um Íslendinga í skattaskjólum á grundvelli yfirlýsingar fjármálaráðherra frá því í gær. Hún segir engu hægt að lofa um árangur af skattheimtu að svo stöddu. Hún segir að sér hafi verið brugðið við yfirlýsingar fjármálaráðherra um seinagang embættisins.

Bryndís segir að unnið verði að málinu í framhaldi af yfirlýsingunni sem kom frá ráðuneytinu í gær: „Næsta skref hjá okkur er að vinna í málinu út frá henni. Og að kanna hvort samningar náist við þennan aðila sem er að bjóða gögnin til kaups og hins vegar að leggja nánar niður fyrir okkur hvernig tekst að vinna úr þeim gögnum að sem hagkvæmast verði.“

Skattrannsóknarstjóri segir jafnframt að það hafi að mörgu leyti verið neikvætt að ráðuneytið hafi tilkynnt um upphæðina, eða það að farið sé fram á 150 milljónir fyrir gögnin. Þarna sé um að ræða fyrsta boð að ræða og ekki sé útilokað að hægt sé að ná betri samningum.

Og um yfirlýsingar fjármálaráðherra um seinagang embættisins vill Bryndís ekki tjá sig frekar, en að sér hafi verið brugðið.