Langflestir standa í skilum

Minnst fimm þúsund viðskiptavinir bankanna og Íbúðalánasjóðs hafa nýtt sér þau úrræði sem í boði eru um greiðslu á íbúðalánum. Þetta jafngildir tæpum fimm prósentum þeirra sem eru með íbúðalán. Tekið skal fram að viðskiptavinir Landsbankans eru ekki inni í tölunum en bankinn vildi ekki tjá sig um stöðuna.

Þetta hefur skilað sér í skilvirkari greiðslum íbúðalána. Á bilinu áttatíu til rúmlega níutíu prósent viðskiptavina bankanna eru í skilum með afborganir fasteignalána, samkvæmt heimildum Fréttablaðsins. Þetta er betri staða en í ágúst þegar fimmtungur þeirra borgaði ekki eða var í vanskilum.

Til samanburðar voru 94,9 prósent lántakenda í skilum við Íbúðalánasjóð um síðustu mánaðamót. Vanskil nema fimm prósentum þar. Það er talsvert meira en í byrjun júní en þá námu vanskil 0,14 prósentum.
Fjármálaeftirlitið vinnur nú að því að taka saman nákvæmar upplýsingar um vanskil heimilanna.

Viðskiptavinir Íbúðalánasjóðs eru 48.944 talsins og eru íbúðalántakar bankanna álíka margir.

Viðmælendur Fréttablaðsins segja lántakendur bankanna leggja hart að sér að greiða af fasteignalánum sínum og nýta sér því þau greiðsluúrræði sem standi til boða.

Fyrsta umræða stjórnarfrumvarps um greiðsluaðlögum heimilanna fór fram á Alþingi á mánudag og hafa vonir verið bundnar við að það taki gildi um mánaðamótin.

Rakel Sveinsdóttir, framkvæmdastjóri Creditinfo, segir fljótt koma í ljós hvort úrræði ríkisstjórnarinnar beri ávöxt. „Flest heimili eiga að finna strax fyrir því þegar greiðslubyrði lækkar. Í kjölfarið má gera ráð fyrir að fólki á vanskilaskrá fækki. Það kemur í ljós á næstu vikum hvort ráð ríkisstjórnarinnar skila árangri," segir hún.