Spyr hvort Ásmundur vilji brjóta gefið loforð

„Alþingi samþykkti það þó í sumar og Vinstri græn hafa gefið loforð í stjórnarsáttmála um að þjóðin fái að kjósa um aðildarsamning. Vill Ásmundur brjóta þetta loforð?" spyr Anna Pála Sverrisdóttir, þingmaður Samfylkingarinnar, í pistli sem birtist á heimasíðu Ungra jafnaðarmanna í dag.

Ásmundur Einar Daðason, þingmaður Vinstri grænna, var kosinn formaður Heimssýnar á aðalfundi félagsins um síðustu helgi en félagið berst gegn inngöngu Íslands í Evrópusambandið. Á fundi með flokksfélögum sínum í byrjun vikunnar sagðist Ásmundur ætla að gera Samfylkingunni lífið leitt þegar kemur að Evrópumálum. „Við slátrum ESB kosningunni," sagði þingmaðurinn ennfremur.

Anna Pála gefur lítið fyrir yfirlýsingar Ásmundar og segir að það sé engin frétt að Ásmundur sé á móti ESB-aðild Íslendinga. Hann eigi fullan rétt á þeirri skoðun og það hafi legið fyrir frá byrjun samstarfs VG og Samfylkingar að flokkarnir séu ekki sammála um sjálfa aðildina.

„Það sem þessir tveir flokkar sammæltust hins vegar um, við myndun ríkisstjórnar í vor, var að fara í aðildarviðræður við ESB og leyfa síðan íslensku þjóðinni að kjósa - loksins - um aðildarsamning," segir Anna Pála.

Pistil Önnu Pálu er hægt að lesa hér.