„Með ólíkindum hvernig heilt bankakerfi varð ræningjavætt“

„Það hefði ekki verið hægt að ná þessum samningum strax í haust þar sem menn vissu ekki hvað þeir höfðu í höndunum. Nú er ákveðinni óvissu eytt í bankakerfinu og tími til að gera hlutina á faglegum forsendum. Það er með ólíkindum hvernig heilt bankakerfi varð ræningjavætt," segir Vilhjálmur Bjarnason, lektor við viðskipta- og hagfræðideild Háskóla Íslands, í samtali við Vísi, aðspurður um samkomulag ríkisins við skilanefndir bankanna.

Hann segir að eftir þá vinnu sem farið hefur fram undanfarna mánuði, þá hafa menn komist að því, að það væru til eignir upp í þau skuldabréf sem bankarnir gáfu út.

Vilhjálmur segir niðurstöðuna ásættanlega og þarna sé ákveðinni óvissu eytt. „Þetta er einfaldlega niðurstaða á eignum þrotabúanna þar sem kemur í ljós að eitthvað er til upp í aðrar skuldir en eingöngu forgangskröfur, þannig að ég tel þetta nokkuð eðlilega og jákvæða niðurstöðu. Við megum líka ekki gleyma því að íslenskir lífeyrissjóðir eiga líka sinn rétt í þrotabúið. Þetta eru ekki bara erlendir kröfuhafar sem eiga rétt í þrotabúið þó svo að þeir séu í meirihluta. Það eru allir kröfuhafar jafnsettir og ég tel þetta ásættanlega niðurstöðu fyrir alla aðila," segir Vilhjálmur.

Vilhjálmur segir ennfremur að hann vilji að í framtíðinni muni eðlilegir viðskiptahættir eiga sér stað í viðskiptalífinu og bankarnir verði reknir af einhverju viti.

„Það er með ólíkindum hvernig heilt bankakerfi í einu landi varð ræningjavætt. Það skiptir mig ekki máli hverjir komi til með að eiga bankana. Það eina sem ég vil að verði gert er að viðskiptalífið verði byggt á faglegum forsendum í framtíðinni, hvort sem eigendurnir eru íslenskir eða erlendir, annað skiptir minna máli," sagði Vilhjálmur að lokum.