Mætti einn í blysför til að þrýsta á Jóhönnu

Fyrir utan skipuleggjanda mætti enginn í blysför sem fara átti í kvöld til að þrýsta á Jóhönnu Sigurðardóttur, forsætisráðherra, til að bjóða sig fram til formanns Samfylkingarinnar. Aftur á móti mættu þrír myndatökumenn og ljósmyndarar frá tveimur dagblöðum.

,,Það kom ekki neinn," sagði Þórhallur Vilhjálmsson, markaðsfræðingur, sem skipulagði blysförina og sendi út tölvupósta þess efnis í dag.

,,Ég gerði þetta frá hjartanu og með engum fyrirvara," Þórhallur ætlar að þrýsta á Jóhönnu eftir öðrum leiðum.

Þórhallur fullyrðir að mætingin í blysförina hafi ekkert með vinsældir Jóhönnu að gera. Kannanir hafi ítrekað sýnt að hún njóti mests traust úr röðum stjórnmálamanna meðal almennings.

,,Vinsældir hennar ná langt út fyrir raðir Samfylkingarinnar," sagði Þórhallur.