Lífið

Alvarpið í loftið í dag

Álfrún Pálsdóttir skrifar
Þessi fríði hópur stendur á bak við Alvarpið.
Þessi fríði hópur stendur á bak við Alvarpið. Vísir/Daníel
„Þetta eru fjölbreyttir þættir fyrir breiðan hlustendahóp,“ segir Ragnar Hansson, einn af aðstandendum Alvarpsins sem fer í loftið í dag.

Alvarpið er hlaðvarp, eins konar útvarpsstöð á netinu, þar sem fjölbreytt úrval þátta er aðgengilegt fyrir hlustendur á vefsíðunni Alvarp.is.

Þáttunum er hægt að hlaða niður á síma og tölvu og hlusta hvenær og hvar sem er.

Hugmyndin að Alvarpinu spratt frá Ragnari, Hugleiki Dagssyni, Diljá Ámundadóttur, Sigurlaugu Gísladóttur, Jóhanni Ævari Grímssyni og Ara Eldjárn.

„Ég hef lengi verið að hlusta á hlaðvarp, eða podcast eins og það kallast á ensku. Við þrír byrjuðum að tala um þetta og svo bara ákváðum við að safna fólki saman og kýla á þetta,“ segir Ragnar en hópurinn hefur verið að vinna að undirbúningi síðan um áramótin.

Ásamt hópnum hér fyrir ofan koma þau Saga Garðarsdóttir, Ugla Egilsdóttir, Gunni Tynes, Bergur Ebbi Benediktsson, Snorri Helgason, Kolfinna Nikulásdóttir og Kristín Björk einnig að Alvarpinu. Þó að margir í hópnum séu tengdir við grín og glens segir Ragnar þættina spanna alla flóruna eins og kvikmyndir, tónlist, þjóðmál og fleira.

„Nafnið var valið af kostgæfni enda planið síðar meir að bæta inn myndböndum. Núna byrjum við smátt og sjáum hvernig þetta vex.“

Formleg dagskrá Alvarpsins hefst á mánudaginn en núna er hægt að hlusta á fyrstu þættina, meðal annars brakandi ferskan þátt Þorsteins Guðmundssonar af Grínistum hringborðsins, sem einu sinni var á dagskrá Rásar 2.

Hefnendurnir - umsjón: Hugleikur Dagsson og Jóhann Ævar Grímsson. 

Áhugavarpið - umsjón: Ragnar Hansson

Ástin og leigumarkaðurinn - umsjón: Saga Garðarsdóttir og Ugla Egilsdóttir

Fíla lag - umsjón: Bergur Ebbi Benediktsson og Snorri Helgason

Grínistar hringborðsins - umsjón: Þorsteinn Guðmundsson

Ísland í dag, satan - umsjón: Kolfinna Nikulásdóttir og Nikulás Stefán Nikulásson

Diljá Ámundadóttir - pródúsent

Gunni Tynes og Sigurlaug Gísladóttir - tæknimenn






Fleiri fréttir

Sjá meira


×