Wow flýgur til Bristol allan ársins hring

Wow air mun hefja flug til Bristol 13. maí á næsta ári en flogið verður þrisvar sinnum í viku, að því er fram kemur í tilkynningu frá fyrirtækinu, á mánudögum, miðvikudögum og föstudögum allan ársins hring. Er Bristol  annar áfangastaður WOW air í Bretlandi en flugfélagið flýgur einnig til London allan ársins hring.

Bristol er næststærsta borg Suður-Englands á eftir London en þar býr u.þ.b. hálf milljón íbúa. Borgin er mikil mennta- og menningarborg með mikla sögu sem nær allt til járnaldar. Fyrr á þessu ári hlaut Bristol nafnbótina „Græn borg“ (European Green Capital), fyrst breskra borga.