Tónlistarhátíð MTV á Íslandi

Forsvarsmenn MTV sjónvarpsstöðvarinnar tóku vel í hugmyndir kynningarhóps, um að halda tónlistarverðlaun stöðvarinnar hér á landi eftir tvö ár, á fundi sem fram fór í gær.

Að sögn Ingvars Sverrissonar sem stendur meðal annarra að útboðinu ætlar MTV að senda lið hingað til lands eftir mánuð til að kanna aðstæður. "Þeir voru mjög jákvæðir og vilja halda hátíðina hér ef við uppfyllum sett skilyrði. Þetta yrði langstærsti viðburður sem haldinn hefur verið hér á landi," segir Ingvar. Hann segir að mikið hafi verið lagt í að sannfæra yfirmenn MTV um að þetta væri hægt, til dæmis hefði um átta til tíu milljónum verið varið í undirbúning kynningarfundsins. Ingvar segir að auglýsingagildið sé metið á annan milljarð. Þá á eftir að taka með í reikninginn aðra innkomu, til dæmis af skatttekjum og eyðslu sem verður gríðarleg."

Tveir staðir koma til greina til að hýsa hátíðina, Laugardalshöll og Egilshöll og yrðu þær báðar notaðar. Þá þarf einnig að leysa önnur mál, til dæmis megi gera ráð fyrir að um fjögur til fimm þúsund hótelpláss þyrfti til að hýsa allan þann mannskap sem hingað kæmi, en hótelpláss eru um tvöþúsund í Reykjavík núna. Ingvar segir einnig að auka þyrfti framboð á fimm stjörnu hótelum. "Við þyrftum sennilega að leigja eitt eða tvö skemmtiferðaskip og koma þeim fyrir í Reykjavíkurhöfn til að leysa það," segir Ingvar.

MTV tónlistarhátíðin er haldin í Róm í ár.